შემიძლია ვთქვა, რომ ეკა ბესელია ჩვენი გუნდისთვის არის ძალიან დასაფასებელი წევრი და ვისურვებდი, რომ დარჩეს „ქართულ ოცნებაში“, – ამის შესახებ პარლამენტის საპროცედურო საკითხთა კომიტეტის თავმჯდომარე გიორგი კახიანმა განაცხადა.
მისი თქმით, არც ერთ შეხვედრაზე არასდროს ყოფილა საუბარი იმაზე, რომ ეკა ბესელიამ დატოვოს ფრაქცია
„რაც ჩვენ [ბიძინა ივანიშვილის] განცხადებაში ამოვიკითხეთ, ეს არის ის, რომ თავის დროზე, ჯერ კიდევ ზაფხულში ასეთი გადაწყვეტილების მიღება უკავშირდებოდა გარკვეულ სირთულეებს, რომელიც მაშინ არსებობდა „ქართულ ოცნებაში“ და რაც იყო მიზეზი ბიძინა ივანიშვილის პოლიტიკაში დაბრუნების. ამის იქით კონკრეტულ დეტალებზე არ ვისაუბრებ, ეს შიდაპარტიული თემებია“, – განაცხადა კახიანმა.
მისივე თქმით, იუსტიციის საბჭოსთვის უზენაესი სასამართლოს მოსამართლეობის კანდიდატების წარდგენის გარკვეული კრიტერიუმების დადგენაზე პარლამენტი აუცილებლად იმსჯელებს.
