მან ხაზი გაუსვა, რომ ზედმეტი სპეკულაციები არ იყოს, ჩამოაყალიბა მკაფიოდ თავის პოზიციები, ხაზი გაუსვა გარკვეულ ნიუანსებს, რომელიც აინტერესებდა საზოგადოებას და ძალიან ბევრ რამეს მოეფინა ნათელი, - ამის შესახებ უმრავლესობის დეპუტატმა დიმიტრი ცქიტიშვილმა „ქართული ოცნების“ ლიდერის, ბიძინა ივანიშვილის განცხადებასთან დაკავშირებით აღნიშნა.
მისი თქმით, ეს განცხადება არის ხაზგასმა, რომ მისი პოზიცია დაფიქსირებულიყო, რადგან მანამდე შესაძლოა, გარკვეულ სპეკულაციებს ჰქონოდა ადგილი, რას ფიქრობს ან რას არ ფიქრობს.
რაც შეეხება უზენაესი სასამართლოს მოსამართლეთა კანდიდატებს, მისი თქმით, გარკვეული კითხვები აქვს ზოგიერთ მათგანთან.
„როგორც არაიურისტი, პოლიტიკურად ვაფასებ და გარკვეული კითხვები მაქვს ზოგიერთ მათგანთან. ამ სიაში არიან ადამიანები, რომლებიც საერთოდ არ ვიცი რას წარმოადგენენ ანუ მათი პროფესიული წარსული არ ვიცი. ამიტომ ვერ ვილაპარაკებ ერთიანობაში სიაზე, მაგრამ გარკვეული დისკომფორტი არსებობს. აზრთა სხვადასხვაობა, რომელიც გაჩნდა სიის შესახებ, ესეც ნათელია. ამიტომ გვჭირდება გადაწყვეტილების მიღება არა სწრაფად, არამედ მსჯელობით და საბოლოო ჯამში, ისეთი ინსტიტუტი მივიღოთ, რომლის მიმართაც საზოგადოებას ექნება მეტი ნდობა, ვიდრე არის დღეს“, - განაცხადა დიმიტრი ცქიტიშვილმა.
ცნობისთვის, ბიძინა ივანიშვილმა დღეს განცხადება გაავრცელა, სადაც აღნიშნულია, რომ გაუგებარი იყო ეკა ბესელიას განცხადება, როდესაც მან კომიტეტის თავმჯდომარის თანამდებობის დატოვება მოსამართლეების არჩევის საკითხს დაუკავშირა.
