ევროპის რეგიონში ყოველწლიურად დაახლოებით 70 ათასი ადამიანი იღუპება „ა ტიპის“ ვირუსით, - ამის შესახებ ჯანდაცვის მსოფლიო ორგანიზაციის საქართველოს ოფისის ხელმძღვანელმა მარიან ივანუშამ განაცხადა.
„ძალიან ვწუხვართ თითოეული ადამიანის გარდაცვალების გამო, მაგრამ უნდა გითხრათ, რომ საქართველოში გარდაცვლილთა რაოდენობა გადაჭარბებული არ არის. რაც შეეხება ევროპის რეგიონს, ზუსტ სტატისტიკას ვერ მოგახსენებთ, რადგან მონაცემები ახლა შემოდის, თუმცა ჩვენ ვიცით, ევროპის რეგიონში ყოველწლიურად დაახლოებით 70 ათასი ადამიანი იღუპება „ა ტიპის“ ვირუსით. სწორედ ამიტომ არის მიჩნეული ეს საკმაოდ სახიფათო დაავადებად. შეიძლება ითქვას, რომ ანალოგიური მდგომარეობაა მეზობელ ქვეყნებშიც“, – განაცხადა მარიან ივანუშამ.
ის საქართველოს ჯანდაცვის სამინისტროს ურჩევს, შეიზღუდოს სამედიცინო დაწესებულებებში მნახველთა შეშვება. მისი თქმით, გარედან შესულმა ადამიანებმა შესაძლოა, სამედიცინო დაწესებულებაში ვირუსის გავრცელებას ხელი შეუწყონ.
„პირველ რიგში რაც უნდა გააკეთოს ჯანდაცვის უწყებამ, მთელი სამედიცინო პერსონალი უნდა იყოს ვაქცინირებული, რადგან ისინი მკურნალობენ გრიპიან პაციენტებსაც, სხვა მიზეზებით ჰოსპიტალიზებულ ადამიანებსაც და მათ შეუძლიათ, გაავრცელონ დაავადება. ჯანდაცვის უწყების მიერ დაწესებულებებში უნდა შეიზღუდოს მნახველების რაოდენობაზე“, - აღნიშნა მან.
ფოტო: საზოგადოებრივი მაუწყებელი
