უკრაინელ ხალხს, უკრაინულ ეკლესიას, უკრაინელ მორწმუნეებს ნამდვილად ეკუთვნით დამოუკიდებელი და ავტოკეფალური ეკლესია, ამიტომ მე მინდა მათ მივულოცო ეს ძალიან სერიოზული მოვლენა, – ამის შესახებ „ევროპული საქართველოს“ ლიდერმა დავით ბაქრაძემ უკრაინის მართლმადიდებლური ეკლესიისთვის ავტოკეფალიის მინიჭებასთან დაკავშირებით განაცხადა.
მისი თქმით, ძალიან სამწუხაროა, რომ საქართველოს მთავრობამ უკრაინელ ხალხსა და უკრაინულ სახელმწიფოს არ მიულოცა.
„რაც შეეხება ქართული ეკლესიის პოზიციას, რა თქმა უნდა, საბოლოო ვერდიქტი უკრაინის ეკლესიის ცნობასთან და მილოცვასთან დაკავშირებით უნდა ჩამოაყალიბოს ჩვენმა ეკლესიამ, წმინდა სინოდმა. მე დარწმუნებული ვარ, რომ ისევე როგორც ყველა სხვა შემთხვევაში, წმინდა სინოდის გადაწყვეტილებები იქნება გააზრებული, იქნება მოფიქრებული და იქნება ისეთი, როგორიც შეესაბამება ჩვენი ქვეყნის სახელმწიფო ინტერესსაც და კანონიკურ კანონმდებლობასაც“, - განაცხადა ბაქრაძემ.
ცნობისთვის, უკრაინის მართლმადიდებელი ეკლესიისთვის ავტოკეფალიის მინიჭების შესახებ ტომოსს კონსტანტინეპოლის პატრიარქმა ხელი 5 იანვარს მოაწერა.
