ირაკლი კობახიძე იქნება თუ ვანო ზარდიაშვილი, ყველამ უნდა აღიაროს ის, რომ საქართველოს სჭირდება ღირსეული მოსამართლეთა კორპუსი, ამ პროცესში თუ ვინმეს თავისი თავი ახლა წაგებული ჰგონია, მემგონი, ეს არაადეკვატურია, - ამის შესახებ იურიდიულ საკითხთა კომიტეტის თავმჯდომარის პირველმა მოადგილე გედევან ფოფხაძემ განაცხადა.
მისი თქმით, იურიდიული კომიტეტის მთავარი ამოცანა დღეს უნდა იყოს ის, რომ ყველაფერი გააკეთოს, რათა ქვეყანაში მართმსაჯულება არ დაზარალდეს და უზენაესი სასამართლოს მოსამართლეების შერჩევის პროცესი იყოს გამჭვირვალე.
"ჩვენ უნდა მივაღწიოთ იმას, რომ უზენაეს სასამართლოში არათუ ცუდი მოსამართლეები არ გაიპარნონ, არამედ მივაღწიოთ სუფთა ბიოგრაფიების მქონე მოსამართლეების გაყვანას. ეს არის იურიდიული კომიტეტის მთავარი დღის წესრიგი და ამოცანა დღეს. აქ თანამდებობაზე საუბარი საერთოდ არ არის. მე ადამიანის უფლებათა კომიტეტში ვთმობ თავმჯდომარის პირველი მოადგილის თანამდებობას იმისათვის, რომ აქ ვიყო. ასე რომ, აქ თანამდებობაზე საუბარი არ არის. ყველას პრინციპულად გვაინტერესებდა ის, რომ იურიდიული კომიტეტი უღირსი მოსამართლეების გამტარად არ იქცეს საპარლამენტო სესიაზე", - განაცხახა გედევან ფოფხაძემ.
