გუნდში აზრთა სხვადასხვაობა არ ნიშნავს უმრავლესობის დაშლას ან გუნდიდან გარკვეული ჯგუფის გამოყოფას, - ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
მისი თქმით, ის რომ უზენაესი სასამართლოს მოსამართლეობის კანდიდატების განხილვა და დამტკიცება არ მოხდა ამ სესიაზე, ეს არის გუნდის საერთო გადაწყვეტილება, სადაც ხელისუფლების და საზოგადოების აზრი ერთმანეთს დაემთხვა.
„მინდა, კიდევ ერთხელ ვთქვა და გავიხსენო ჩვენი პარტიის თავმჯდომარის არაერთი განცხადება, სადაც მკაფიო აქცენტს აკეთებდა, რომ სასამართლო ხელისუფლებას უნდა ჰქონდეს დამოუკიდებლობა, ის რაც გარანტირებულია კონსტიტუციით და მის გადაწყვეტილებაში ჩარევა არ არის ჩვენი გუნდის არჩევანი. სწორედ ამ დამოუკიდებლობის ფარგლებში წარმოადგინეს კანდიდატები პარლამენტში, თუმცა მიღებულია გადაწყვეტილება, რომ ამ საკითხს დავუბრუნდებით საგაზაფხულო სესიაზე“, - განაცხადა არჩილ თალაკვაძემ.
შეგახსენებთ, ეკა ბესელიამ დღეს იურიდიულ საკითხთა კომიტეტის თავმჯდომარის თანამდებობა დატოვა.
