ყველაზე მნიშვნელოვანია, იურიდიული კომიტეტის ახალი თავმჯდომარე არ იყოს ადამიანი, რომელიც ჩინჩალაძეს დაუჭერს მხარს, – ამის შესახებ მმართველი გუნდის წევრმა ლევან გოგიჩაიშვილმა განაცხადა.
მისი თქმით, მოსამართლეთა სიის საკითხის შეჩერება სწორედ იურიდიულ საკითხთა კომიტეტის დამსახურებაა.
„გუშინდელი სია პარლამენტში ჩავარდა. სია, რომელზეც ვფიქრობდი, რომ გავიდოდა და ეს ადამიანები ხალხს წაართმევდნენ მომავალს, ეს გუშინ დამთავრდა. შესაბამისად, განცხადება, რომ პარლამენტმა გადადო საკითხი, მოდიოდა იურიდიული კომიტეტიდან. კომიტეტზე საკითხი არ გავიდოდა და ეს იყო პრინციპული გადაწყვეტილება ჩვენი კომიტეტის უმრავლესობის. ახლა მნიშვნელოვანია პროცესი, რომელიც უნდა დაიწყოს თავმჯდომარის არჩევასთან დაკავშირებით“, – განაცხადა ლევან გოგიჩაიშვილმა.
მისივე თქმით, ეკა ბესელიამ განმარტა პოსტის დატოვების მიზეზები, რაც ძალიან დასაფასებელია.
ცნობისთვის, ეკა ბესელიამ დღეს იურიდიულ საკითხთა კომიტეტის თავმჯდომარის თანამდებობა დატოვა.
შეგახსენებთ, პარლამენტი უზენაესი სასამართლოს მოსამართლეთა დანიშვნის გადაწყვეტილებას მიმდინარე სესიაზე არ მიიღებს.