ხორბლის შემდეგ რუსეთმა, შესაძლოა, მზესუმზირის თესლისა და მზესუმზირის ზეთის ექსპორტი აკრძალოს. ასეთი შინაარსის თხოვნა ზეთის მწარმოებელთა ასოციაციამ რუსეთის პირველ ვიცე-პრემიერს ვიქტორ ზუბკოვსა და სოფლის მეურნეობის მინისტრს ელენა სკრინიკს უკვე გაუგზავნა. აღნიშნულის მიზეზად კავშირი პროდუქციის ფასის ერთნახევარჯერ ზრდას ასახელებს.
ზეთის მწარმოებელთა კავშირი მთავრობას საექსპორტო-საბაჟო გადასახადის გაზრდას 30 %-მდე სთხოვს, თუმცა ამ დროისათვის საექსპორტო-საბაჟო გადასახადი 20 %-ს შეადგენს.
2009-2010 წლების სეზონზე რუსეთში 2,5 მლნ ტონა მზესუმზირის ზეთის წარმოება მოხდა, საიდანაც 500 ათასი ტონა ექსპორტზე გავიდა.
გვალვისა და გაუსაძლისი სიცხეების გამო რუსეთში მარცვლეული კულტურების უდიდესი ნაწილი განადგურდა, რამაც ქვეყანას მარცვლეულის ექსპორტის აკრძალვის გადაწყვეტილება მიაღებინა. რუსეთმა ხორბლის ექსპორტზე ამბარგო 2010 წლის 15 აგვისტოს გამოაცხადა, რომელიც 2010 წლის 31 დეკემბერს უნდა შეწყდეს.
