„ქალთა მოძრაობა“ ეკონომიკისა და მდგარი განვითარების მინისტრის, გიორგი ქობულიას გუშინდელ განცხადებას ეხმაურება.
როგორც „ქალთა მოძრაობა“ აღნიშნავს, რეალობის ფონზე, როდესაც ეკონომიკის მინისტრი ეკონომიკურად არააქტიური ქალების საშინაო საქმეში გამოკეტვას პერსონალურ პასუხისმგებლობად და უფრო მეტიც, სიზარმაცედ განიხილავს, სხვა არაფერია, თუ არა სახელმწიფოს უცოდინრობა და ხედვის არქონა ქალთა ეკონომიკური გაძლიერების კუთხით.
„ფაქტია, რომ საქართველოში ქალების დიდი ნაწილი ანაზღაურებად შრომაში არ არის ჩაბმული, მაგრამ ამ რეალობის მიზეზი, ცხადია, სიზარმაცე არ გახლავთ; მიზეზები იმაზე მეტად კომპლექსური და მძიმეა, ვიდრე ეს ღატაკი ქვეყნის მინისტრს წარმოუდგენია.
უახლესი მონაცემებით, ქალები, რომლებსაც მინისტრის აზრით „მუშაობა არ უნდათ“, კაცებთან შედარებით 3-ჯერ მეტ დროს უთმობენ არაანაზღაურებად საოჯახო საქმიანობას იმისდა მიუხედავად, დასაქმებულნი არიან თუ არა - საშუალოდ, ქალები საქართველოში კვირაში 45 საათს ხარჯავენ საოჯახო შრომაზე, რაც სრული განაკვეთით შრომის საათებს აღემატება. დასაქმებული ქალები, საშუალოდ, 42 საათს უთმობენ საოჯახო შრომას - რაც მიუთითებს, რომ ისინი ორმაგ შრომით ტვირთს ატარებენ. იმ ქალების 49%, რომელიც აცხადებს, რომ არ მუშაობს, ამის მიზეზად საოჯახო ვალდებულებებს ასახელებს. ყველაზე მაღალი განსხვავება ქალისა და კაცის დასაქმების დონეებს შორის შეინიშნება 25-44 წლის ასაკში, რაც მიუთითებს, რომ საქართველოში ქალებს უჭირთ ბავშვის აღზრდისა და დასაქმების შეთავსება. 44 წლის შემდეგ ქალების დასაქმების დონე მატულობს (UN Women, CRRC 2018). საბავშვო ბაღების ხელმისაწვდომობა და დეკრეტული შვებულება მთავარი საკითხებია გადასაწყვეტ პრობლემათა შორის.
იმავე კვლევის მიხედვით, საქართველოში ყოველი მეხუთე ქალი, რომელიც ამბობს, რომ არ მუშაობს აცხადებს, რომ ქმარი არ აძლევს მუშაობის უფლებას. ამ ეკონომიკურ ძალადობაზე რატომ არ საუბრობს სახელმწიფო?
გიორგი ქობულიას ასევე შევახსენებთ, რომ საქართველოში ანაზღაურებადი სამსახური ქალებისათვის, ხშირ შემთხვევაში, დისკრიმინაციული და მტრულია. ყოველი მეხუთე ქალი სექსუალური შევიწროვების მსხვერპლია (ქალთა მიმართ ძალადობის ეროვნული კვლევა, 2017), ხოლო დასაქმებული ქალები 41%-ით ნაკლებ შემოსავალს გამოიმუშავებენ, ვიდრე კაცები (UN Women, CRRC). სინამდვილეში ამ ქალების ერთ-ერთი ძირითადი დემოტივატორი არასაკმარისი ანაზღაურებაა.
დაბალხელფასიანი სამსახურების შემთხვევაში ქალებს ორმაგ, სრულგანაკვეთიან პირობებში უწევთ ცხოვრება და მუშაობა. ამ რეალობის ფონზე, როდესაც ეკონომიკის მინისტრი ეკონომიკურად არააქტიური ქალების საშინაო საქმეში გამოკეტვას პერსონალურ პასუხისმგებლობად და უფრო მეტიც, სიზარმაცედ განიხილავს, სხვა არაფერია, თუ არა სახელმწიფოს უცოდინრობა და ხედვის არქონა ქალთა ეკონომიკური გაძლიერების კუთხით.
ქალთა მოძრაობა მოგიწოდებთ, იმუშაოთ ქალთა ეკონომიკური გაძლიერების სახელმწიფო სტრატეგიაზე და იზრუნოთ, რომ ქალების არაანაზღაურებადი შრომა გადაინაწილოს სახელწიფომ - გამართეთ მზრუნველობითი სერვისები, დაარეგულირეთ ბაზარზე არსებული უთანასწორო ხელფასები და გადახედეთ დეკრეტული შვებულების პოლიტიკას. ბატონო მინისტრო, თუ თქვენ გაქვთ სურვილი გაიგოთ, თუ რა გზებით ვფიქრობთ ეკონომიკურად არააქტიური ქალების საბაზრო ეკონომიკაში ჩართვას, შეგვხვდით - ჩვენ მზად ვართ გაგიზიაროთ საკუთარი ცოდნა და ხედვები“, - ნათქვამია განცხადებაში.
ცნობისთვის, გუშინ ქობულიამ განაცხადა, რომ „არიან დიასახლისები, რომლებიც აცხადებენ, რომ ჩვენ მუშაობა არ გვინდა“.