დღეს, 9 სექტემბერს, აშშ-საქართველოს ბიზნესსამიტი დასრულდება.
სამიტის ფარგლებში, ამერიკულ კომპანიებს საშუალება ეძლევათ, კონტაქტი დაამყარონ საქართველოს როგორც კერძო, ასევე სახელმწიფო სექტორის წარმომადგენლებთან.
8 სექტემბერს ბიზნესსამიტზე განიხილეს ისეთი საკითხები, როგორიცაა: აშშ-ის მთავრობის რესურსები, კომერციული თანამშრომლობის შესაძლებლობები საქართველოში, საერთაშორისო მხარდაჭერა ბიზნესგანვითარებისთვის და თანამშრომლობის პერსპექტივები (მაგ. ფრანჩაიზის და ტურიზმის დარგში).
9 სექტემბერს, ნახევარი დღის განმავლობაში, სამიტის მონაწილეებს შესაძლებლობა ექნებათ პირისპირ შეხვდნენ სამიტის რჩეულ გამომსვლელებს.
სამიტის პარალელურად ამერიკის სავაჭრო პალატა საქართველოში მართავს აშშ-ის ვაჭრობის დეპარტამენტის მიერ სერთიფიცირებულ სავაჭრო მისიას იმ ამერიკული კომპანიებისათვის, რომლებიც დაინტერესებულნი არიან საქართველოს ბაზრით.
აღნიშნულ ბიზნესსამიტს აშშ-ის სავაჭრო პალატა საქართველოში ამერიკის საელჩოსთან თანამშრომლობით მართავს.
ბიზნესსამიტი სასტუმრო "თბილისი-მარიოტში" იმართება.
