საპარლამენტო უმრავლესობის წევრმა ენძელა მაჭავარიანმა დარგობრივი ეკონომიკის კომიტეტის სხდომაზე ეკონომიკის მინისტრს გიორგი ქობულიას სთხოვა, წარმოედგინა გეგმა, თუ როგორ აპირებს ის ქვეყანაში ეკონომიკისა და კეთილდღეობის გაზრდას.
ენძელა მაჭავარიანის თქმით მინისტრის საკომიტეტოს სიტყვის შესავალი ზოგადია და ეკონომიკის სახელმძღვანელოშიც წერია.
"აქ [პრეზენტაციაში] წერია, რომ გავზარდოთ კეთილდღეობა... როგორ ბატონო, როგორ უნდა გააკეთოთ ეს, ეს ჩვენც ვიცით და ეკონომიკის სახელმძღვანელოში, რო გადავშალოთ, ის თქვენი შესავალი, იქაც წერია, მაგრამ ეს როგორ უნდა შექმნას ჩვენმა პოლიტიკურმა გუნდმა თქვენი ხელმძღვანელობით, იმიტომ რომ თქვენ ამ დარგის, როგორც პოლიტიკური ასევე ეკონომიკური ხელმძღვანელი ბრძანდებით და ეს ხედვა აქ ვერ დავინახე", - განაცხადა მაჭავარიანმა.
ენძელა მაჭავარიანი თქმით, მინისტრისგან ვერ მოისმინა პოლიტიკური გეგმა თუ როგორ აპირებს პოლიტიკური გუნდი სიღარიბის დაძლევას.
"რას გვეუბნებით იმ ადამიანებს, მაგალითად მე მაქვს ვალი დოლარში და ასეთი ძალიან ბევრია და ჩემი ვალი ჩვენი ხელისუფლების პირობებში 2.5-ჯერ გაიზარდა და ეს განაპირობებს იმას, რომ მე უფრო ღარიბულად ვიცხოვრებ, ვიდრე აქამდე ვცხოვრობდი. ასეთ საკითხები როგორ იქნება მოგვარებული?", - დასძინა ენძელა მაჭავარიანმა.
შეგახსენებთ, რომ პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე ეკონომიკის მინისტრ გიორგი ქობულიას უსმენენ.
