ბატონო გიორგი, თქვენ ახლა დაინახეთ ძალიან სასაცილო და თვალთმაქცური ტაქტიკა უმრავლესობის წევრების, რომლებმაც გადაწყვიტეს, რომ დაასწრონ ოპოზიციას და დასვან ყველა მწვავე შეკითხვა რაც კი არსებობს თქვენს მიმართ, - ასე მიმართა საპარლამენტო უმცირესობის წევრმა რომან გოცირიძემ შინაგან საქმეთა მინისტრ გიორგი გახარიას პარლამენტის სხდომაზე.
მისი თქმით, უმრავლესობა ისე ცდილობს წარმოჩენას, რომ თითქოს დღეს ღვრიან ნიანგის ცრემლებს, როდესაც თავად აფარებდნენ ხელს დამნაშავეებს და ხელს უშლიდნენ დროებითი საგამოძიებო კომისიების შექმნაში.
გოცირიძის განცხადებით, უმრავლესობი წევრები იყვნენ წინააღმდეგნი, რომ ნათელი მოჰფენოდა მთელ ამ დანაშაულებებს, ახლა კი დგანან და შეკითხვებს სვამენ ნაღვლიანი სახეებით.
„თუმცა, ერთი შეკითხვის დასმა მაინც ვერ გაბედეს: ბატონო გიორგი, როგორ ხსნით იმას, რომ ამ არჩევნებში პოლიცია და პატრული, პირადად ჩემს საარჩევნო უბანში იდგა ქუჩის წვრილფეხა კრიმინალებთან ერთად და მსხვილფეხა კრიმინალებთან ერთად, ქურდებთან და მოქურდო ელემენტებთან ერთად მართავდნენ ქვეყანაში საარჩევნო პროცესს. გრცხვენიათ თუ არა იმის გამო, რომ შელახეთ პოლიციელის მუნდირი?“, - მიმართა გოცირიძემ გახარიას.
