ჩვენთვის არასოდეს ყოფილა პრობლემა პარლამენტში მოსვლა, ჩვენ არასოდეს შეგვშინებია მწვავე კითხვების და ჩვენ ყოველთვის გვესმოდა პარლამენტის მაკონტროლებელი ფუნქცია, - ამის შესახებ შინაგან საქმეთა მინისტრმა გიორგი გახარიამ პარლამენტში განაცხადა, სადაც ამ წუთებში ანგარიშს წარადგენს.
"ჩვენ თავს ვალდებულად ვთვლით, რომ ანგარიში ჩავაბაროთ პარლამენტს, მაგრამ გპირდებით, რომ ეს იქნება სტრუქტურირებული, ძალზედ მოკლე და კონკრეტულ გეგმებზე ორიენტირებული მოხსენება", - განაცხადა გახარიამ.
შს მინისტრმა იმედი გამოთქვა, რომ მასსა და დეპუტატებს შორის დიალოგი დამყარდება და აქვე მათ მოუწოდა დეპუტატებს, პარლამენტში მისი მისვლა პოლიტიკური მიზნით არ გამოიყენონ.
"მინდა გითხრათ, რომ ჩვენ აქ ვიმყოფებით შინაარსობრივი დისკუსიისთვის და არა პოლიტიკური ცეკვებისთვის კამერების წინ და არც ფსევდოინტელექტუალური ფუჭი, უმიზნო დებატებისთვის. იმედი მაქვს, შევძლებთ დავამყაროთ დიალოგი", - მიმართა გახარიამ დეპუტატებს.
