კომპანია „თელასი" აცხადებს, რომ 2007 წლის 1 მარტამდე დევნილების მიერ მოხმარებული ელექტროენერგიის დავალიანების ჩამოწერასთან დაკავშირებით სახელმწიფოსთან გაფორმებული მემორანდუმით გათვალისწინებული პროცედურების შეუსრულებლობის შესახებ გავრცელებული ინფორმაცია მცდარია და სინამდვილეს არ შეესაბამება.
კომპანია „თელასმა" თბილისში კომპაქტურად განთავსებული დევნილების მიმართ ორმხრივი მემორანდუმის პირობები პირნათლად შესარულა და ამ კატეგორიის მომხმარებლების ვალები ჩამოწერა. აღნიშნული პროცედურა შეეხო თბილისის აეროპორტის მიმდებარედ მაცხოვრებელი დევნილთა კომპაქტურად ჩასახლების ობიექტსაც, რომლის დავალიანება 2007 წლის 1 მარტამდე 212947 ლარს შეადგენდა.
ამ ობიექტზე განსახლებული დევნილი მოსახლეობის მიერ სახელმწიფო სუბსიდიებით გათვალისწინებული ელექტროენერგიის ოდენობის გადახარჯვის შედეგად წარმოიშვა ახალი დავალიანება, რაც ელექტროენერგიის მიწოდების შეწყვეტის მიზეზი გახდა.
2010 წლის 1 სექტემბრის მდგომარეობით აერეპორტის ტერიტორიის მახლობლად მდებარე კომპაქტურად განსახელბის შენობაში მცხოვრები დევნილების მიერ დაგროვილი დავალიანების საერთო რაოდენობა 121441 ლარს შეადგენს. მხოლოდ 2010 წელს სახელმწიფო სუფსიდიით ელექტროენერგიის გათვალისწინებული ლიმიტის გადახარჯვამ 4 ათას 672 ლარი შეადგინა.
მოცემული ობიექტისათვის ელექტროენერგიის მიწოდება აღდგენისა და ინდივიდუალური გამრიცხველიანების პროექტის დასაწყებად, „თელასი" დევნილების მხრივ არსებული დავალიანების აღიარებას ითხოვს. ამავდროულად „თელასი" მზადაა ამ ობიექტზე მაცხოვრებელი მოქალაქეებისთვის შეიმუშაოს ვალის დაფარვის სპეციალური გრაფიკი.
კომპანია აღნიშნულ ობიექტზე ელექტროენერგიის აღრიცხვის ინდივიდუალური კვანძების დაყენებასთან დაკავშირებული სამუშაოების შესასრულებლად ყოველმხრივ მზად არის: შემუშავებული აქვს შესაბამისი ტექნიკური გადაწყვეტილებები და შესაბამისი პროექტები.