ცესკო-ს თავმჯდომარეობის არც ერთი კანდიდატი არ მეგულება, რომელსაც აბსოლუტური მხარდაჭერა ექნება, – ამის შესახებ პარლამენტის იურიდიულ საკითხთა კომიტეტის თავმჯდომარე ეკა ბესელიამ განაცხადა.
მისი თქმით, დასახელებულ კანდიდატებიდან კვალიფიკაცია და გამოცდილება ყველას აქვს.
„ცესკო-ს თავმჯდომარის არჩევის მიზნით პროცედურების დასრულებას და პრეზიდენტის გადაწყვეტილებას დაველოდოთ, რომლის შემდეგ შესაძლებელი იქნება უფრო მკაფიო საუბარი კანდიდატებზე. არც ერთი კანდიდატი არ მეგულება, რომელსაც აბსოლუტური მხარდაჭერა ექნება ყველას მხრიდან. კრიტიკა ობიექტური უნდა იყოს. დასახელებულ კანდიდატებს კვალიფიკაცია და გამოცდილება ყველას აქვს. საინტერესო კანდიდატები არიან“, – განაცხადა ეკა ბესელიამ.
შეგახსენებთ, გუშინ ცესკო-ს თავმჯდომარეობის 4 კანდიდატურა დასახელდა: თამარ ჟვანია - ცენტრალური საარჩევნო კომისიის თავმჯდომარე, გიორგი ჯავახიშვილი - ცენტრალური საარჩევნო კომისიის მდივანი, ლადო ბოჟაძე -“სამოქალაქო საზოგადოებისა და დემოკრატიის განვითარების ცენტრის” ხელმძღვანელი, მარიამ შელეგია. გიორგი ჯავახიშვილმა პროცესში მონაწილეობაზე უარი განაცხადა.
