საქართველოს ნავთობისა და გაზის კორპორაციამ მაგისტრალური გაზსადენის საგურამო-ნავთლუღის 50-კილომეტრიანი მონაკვეთის მშენებლობისთვის საჭირო მილების შეძენის მიზნით საერთაშორისო ტენდერი გამოაცხადა.
ორ ლოტად გამოცხადებულ ტენდერში გამარჯვებულმა კომპანიამ კორპორაციას 700 მმ-იანი მილები ორ ეტაპად 2010 წლის 15 დეკემბრამდე უნდა მიაწოდოს.
ტენდერში მონაწილეობა შეუძლიათ დაინტერესებულ ფიზიკურ და იურიდიულ პირებს, რომლებმაც შესაბამისი წინადადება კორპორაციის სატენდერო კომისიას 28 სექტემბერს უნდა წარუდგინონ. სატენდერო წინადადებები გაიხსნება 28 სექტემბერს, 16:00 საათზე.
საგურამო-ნავთლუღის 700მმ-იანი მაგისტრალური გაზსადენის 50 კმ-იანი მონაკვეთის მშენებლობის პროექტი "საგურამო - წითელი ხიდის" პროექტის მეორე ეტაპია. პირველ ეტაპზე უკვე აშენდა გარდაბანი-ნავთლუღის 30-კმ-იანი მონაკვეთი. საქართველოს ნავთობისა და გაზის კორპორაციის დაკვეთით საგურამო-ნავთლუღის პროექტი უკრაინულმა კომპანია "ვნიპიტრანსგაზმა" მოამზადა.
