კახეთის გუბერნატორის, ირაკლი ქადაგიშვილის ინფორმაციით, ოპოზიცია ინაუგურაციის მიმდებარე ტერიტორიაზე აქციას ვერ გამართავს.
მისი განმარტებით, როდესაც ოპოზიციამ მერიას მიტინგის ჩატარების მოთხოვნით მიმართა, მათ მიეცათ განმარტება, რომ ამ ტერიტორიაზე სახელმწიფო ღონისძიება უკვე დაგეგმილია, ამიტომ მიმდებარე ტერიტორიაზე, რომელიც უსაფრთხოების ზონას წარმოადგენს, საპროტესტო აქცია წარმოუდგენელია.
"მერიამ შესთავაზა ცენტრალურ მოედანზე ჩაეტარებინათ ეს ღონისძიება. გამოყოფილი არის მათთვის თელავის ერთ-ერთი ცენტრალური მოედანი. აქ აქციას ვერ გამართავენ, რადგან ეს ტერიტორია არის სახელმწიფო ღონისძიებისთვის განკუთვნილი",- განაცხადა ქადაგიშვილმა, რომელმაც აქვე აღნიშნა, რომ ოპოზიციას აქვს არჩევანი - წავიდეს შემდგომი მარგინალიზაციის გზით თუ ჩაეტიოს დემოკრატიული თავისუფლების გამოხატვის ჩარჩოებში.
ცნობისთვის, ოპოზიციის კოლონა თელავისკენ უკვე მიემართება. მათი თქმით, ისინი აქციის გამართვას თელავის ცენტრში აპირებენ.
