თელავში, იმ მოედანთან მისასვლელი გზები, სადაც გაერთიანებული ოპოზიცია საპროტესტო აქციის გამართვას გეგმავს, პოლიციას გადაკეტილი აქვს.
მოედანი ერეკლე მეფის სასახლისკენ მიმავალ გზაზე, ერეკლე მეფის ძეგლსა და რვაასწლოვან ჭადარს შორის მდებარეობს.
ცნობისთვის, თელავის მერიამ გაერთიანებულ ოპოზიციას ერეკლე მეორეს ძეგლთან აქციის გამართვის ნებართვა არ მისცა და ალტერნატიული ტერიტორია შესთავაზა. თუმცა, ოპოზიცია გეგმავს, რომ აქცია თელავის ცენტრში გამართოს.
ოპოზიციის კოლონა უკვე მიემართება თელავისკენ. თელავში კი, ინაუგურაციის ბოლო დეტალები სრულდება.
შეგახსენებთ, საქართველოს მეხუთე პრეზიდენტის, სალომე ზურაბიშვილის ინაუგურაცია თელავში, 15:00 საათზე დაიწყება და 40 წუთის განმავლობაში გაგრძელდება.
