დღეს არც ერთი უცხოელის სახელზე სასოფლო-სამეურნეო მიწა არ დარეგისტრირებულა, - ამის შესახებ იუსტიციის მინისტრმა თეა წულუკიანმა განაცხადა.
ის "ქართული მარშის" დღევანდელ აქციას გამოეხმაურა და აღნიშნა, რომ ვნებათაღელვა უადგილოა.
"მაგალითისთვის მინდა ვთქვა, რომ საქართველოს მასშტაბით, დღეს არც ერთი უცხოელის სახელზე სასოფლო-სამეურნეო მიწა არ დარეგისტრირებულა. შესაბამისად, ვნებათაღელვა არის უადგილო. არ არის საჭირო ღია კარის მტვრევა და მით უმეტეს, ხელის შეშლა სხვებისთვის. ყველას მინდა მოვუწოდო სიმშვიდისკენ და სხვა მოქალაქეების პატივისცემისკენ", - განაცხადა თეა წულუკიანი.
მისივე თქმით, დღევანდელმა აქციამ ბევრ ადამიანს, რომლებიც მომსახურების მისაღებად იყვნენ იუსტიციის სახლში მისულები, ხელი შეუშალა.
"როცა საკუთარ აზრს გამოვხატავთ, უნდა გავითვალისწინოთ, რომ თბილისის იუსტიციის სახლში ყოველდღიურად მოდის 10 000-ობით ადამიანი. ზოგს აქვს პასპორტი ასაღები, ზოგს გარდაცვალების რეგისტრაცია ეჩქარება, ზოგს დაბადების მოწმობა სჭირდება. ასეთ ადამიანებს, დღეს სამწუხაროდ, ხელი შეუშალა საპროტესტო აქციამ. დიდი იმედი მინდა გამოვთქვა, რომ ხვალიდან ეს მომსახურება განახლდება", - აღნიშნა წულუკიანმა.
ცნობისთვის, ე.წ. "ქართულმა მარშმა" დღეს იუსტიციის სახლთან პიკეტი მოაწყო. ისინი საკონსტიტუციო სასამართლოს გადაწყვეტილებას აპროტესტებენ, რომლის მიხედვითაც, უცხო ქვეყნის მოქალაქეებზე მიწის შესყიდვაზე მორატორიუმი გაუქმდა.
შეგახსენებთ, ცნობისთვის, საკონსტიტუციო სასამართლოს პლენუმმა სასოფლო-სამეურნეო დანიშნულების მიწების უცხოეთის მოქალაქეებზე გასხვისებასთან დაკავშირებით დაწესებული მორატორიუმი არაკონსტიტუციურად გამოაცხადა. მოსამართლეებმა გადაწყვეტილება საბერძნეთის მოქალაქეების საჩივრის საფუძველზე მიიღეს, რომლებიც მემკვიდრეობით მიღებულ მიწის ნაკვეთებს საკუთრებაში ვერ ირეგისტრირებდნენ. უცხოეთის მოქალაქეებზე მიწების გასხვისების მორატორიუმი ძალადაკარგულად გამოცხადდა, თუმცა შეზღუდვები მხოლოდ 16 დეკემბრამდე მოიხსნა, რადგან პრეზიდენტის ინაუგურაციის შემდეგ ახალი კონსტიტუცია ამოქმედდება, რომელიც სასოფლო-სამეურნეო დანიშნულების მიწების უცხოეთის მოქალაქეებზე გასხვისების შესახებ შეზღუდვებს კვლავ აწესებს.
