სავარაუდოდ, საბოლოოა, რომ ინაუგურაცია თელავში გაიმართება. ამაზე იყო შეთანხმება და შემდეგ ამის შესახებ არჩეულმა პრეზიდენტმა განაცხადა. დღევანდელ შეხვედრაზე ადგილმდებარეობის შეცვლა არ განიხილებოდა, – ამის შესახებ მთავრობის ადმინისტრაციაში გამართულ შეხვედრის შემდეგ სალომე ზურაბიშვილის წარმომადგენელმა ლაშა ჟვანიამ განაცხადა.
მისი თქმით, დღეს ტექნიკური საკითხები განიხილეს, მათ შორის სტუმრების მოწვევისა და მათი განთავსების შესახებ დეტალები.
ჟურნალისტის კითხვაზე, იმიტომ ხომ არ შეირჩა თელავი ინაუგურაციის ცერემონიის ადგილად, რომ აღნიშნულ ქალაქში სალომე ზურაბიშვილმა არჩევნები წააგო, ლაშა ჟვანია ამბობს, რომ ამას არ გამორიცხავს.
„გარდა ამის, შეიძლება, სხვა მიზეზიც იყოს. ერთ-ერთი ის, რომ მთელი წინასაარჩევნო კამპანიის განმავლობაში, როგორც არჩეული პრეზიდენტი ბრძანებდა, პირველ რიგში, ის იქნება რეგიონების პრეზიდენტი, რომ რეგიონებს მიაქცევს განსაკუთრებულ ყურადღებას და პირველი გზავნილი მისი მხრიდან ინაუგურაციის დღესვე იქნება, რომ თავის დანაპირებს ასრულებს“, – განაცხადა ლაშა ჟვანიამ.
