გამარჯვებულის პოზიციაში არის ოპოზიცია და ხალხი და დამარცხებულის პოზიციაში არის ხელისუფლება, რომელსაც ინაუგურაციის ჩატარებისაც კი ეშინია დედაქალაქში, - ეს განცხადება ერთიანი ნაციონალური მოძრაობის თბილისის ორგანიზაციის თავმჯდომარემ, ზაალ უდუმაშვილმა, არჩევანის ეთერში გაერთიანებული ოპოზიციის სამომავლო გეგმებზე საუბრისას გააკეთა.
უდუმაშვილის თქმით, გრიგოლ ვაშაძემ მოსახლეობასთან შეხვედრები უკვე დღეიდან დაიწყო და პირველ ეტაპზე რუსთაველებს შეხვდა.
უდუმაშვილის თქმით, 16 დეკემბრამდე, როდესაც ულტიმატუმის ვადა იწურება, მთელი საქართველოს მასშტაბით დაასრულებენ შეხვედრებს მოსახლეობასთან და ასევე მოლაპარაკებებს ოპოზიციასთან.
„იმდენად შეშინებულები არიან, რომ იმასაც ვერ ბედავენ, თბილისში ჩაატარონ ინაუგურაცია თავისი დანიშნული პრეზიდენტის. დარბიან ქალაქ-ქალაქ, არჩევენ, სად უფრო უსაფრთხო იქნება. ახლა, თითქოს თავს დავესხმებით ჩვენ „მადამ პიურეს“. ვინ არის ახლა გამარჯვებულის პოზიციაში? გამარჯვებულის პოზიციაში არის ოპოზიცია და ხალხი და დამარცხებულის პოზიციაში არის ხელისუფლება, რომელსაც ინაუგურაციის ჩატარებისაც კი ეშინია დედაქალაქში“, - განაცხადა ზაალ უდუმაშვილმა.
