შევიკრიბეთ, ქალაქის მერის შემზარავი ანტისახელმწიფოებრივი განცხადების გამო, - ამის შესახებ გაერთიანებული ოპოზიციის წარმომადგენელმა თაკო ჩარკვიანმა დღევანდელ ბრიფინგზე განაცხადა.
მისი თქმით, ქალაქის მერმა მოუწოდა დაჯგუფებებს ოჯახების შევიწროვებისკენ.
„ვკითხულობ მის ამონარიდს - „რასაც დასთესავ იმას მოიმკი“. რა თქმა უნდა, ამას, ცხადია, გაგრძელება ექნება და ჩვენ საერთაშორისო ორგანიზაციებს შევატყობინებთ. პრაქტიკულად ოჯახი აღმოჩნდა დიდი დარტყმის, მოსალოდნელი დარტყმის ქვეშ, იმიტომ რომ პრაქტიკულად გააპრავა ბოროტმოქმედება მოქმედმა ქალაქის მერმა. ვინაიდან მისი თანამშრომელი არის დავით მაჭავარიანი, პრაქტიკულად ამ ინცინდენტის ერთ-ერთი ორგანიზატორი იყო, ეს გახლავთ საკრებულოს პროტოკოლის სამსახურის უფროსი....
ამ ინციდენტზე კიდევ უარესი იყო ქალაქის მერის განცხადება, რაც არის კატასტროფა, არასახელმწიფოებრივი გამოსვლა. ჩვენ მივიღეთ რუსული კორუფციული მართვის ტიპის სახელმწიფო, რომელიც შემოგვთავაზა ბიძინა ივანიშვილმა. დიახ, ბატონო ბიძინა, ამიტომ წავედი ოპოზიციაში 2012 წელს, როცა ვნახე, რომ თქვენ ხელისუფლება კი არ გინდოდათ, არამედ გინდოდათ ბევრი „ბანდერლოგი“ თანამდებობაზე, რათა იოლად გაგეყიდათ ეს ქვეყანა. ჩვენ ვართ ოჯახები, ისტორიას კი პიროვნებები და ოჯახები ქმნიდნენ, ამ ქვეყანას არ დავთმობთ. თუ „ნაციონალური მოძრაობის“ 400 ათასი ამომრჩეველი იყო, ახლა გახდა 800 ათასი. როდესაც მოვიდა „ქართული ოცნება“, დამნაშავედ გამოცხადდა რომელიმე პარტია? ქალაქის მერი მოუწოდებს, რომ 800 ათასი ადამიანის ოჯახი შევიწროვდეს. ხვალ დილით ვხდებით ეუთო-ს წარმომადგენლებს, ბოდიში უკვე ამ საქმეს არ უშველის, ვითხოვთ ამ ანტისახელმწიფოებრივი განცხადების გამო, გათავისუფლდეს სამსახურიდან ქალაქის მერი, აღარ ვსაუბრობ მაჭავარიანზე, უხერხულია, რომ ასეთი კრიმინალია”, - განაცხადა ჩარკვიანმა.
