გაერთიანებული ოპოზიციის ერთ-ერთი ლიდერის, გიორგი ვაშაძის განცხადებით, ის უკრაინის დაკავებულ მოქალაქეებს არ იცნობს.
მისი თქმით, ისინი 27-ში, არჩევნების წინა დღეს აჩამოვიდნენ ქვეყანაში, შესაბამისად, 27-28-ში არავინ იცოდა საერთოდ იქნებოდა თუ არა აქცია. ამიტომ, ვაშაძე ამბობს, რომ ტყუილია, რომ ეს ადამიანები ჩამოვიდნენ აქციაში მონაწილეობისთვის.
„მე პარლამენტის წევრი სემენჩენკო გამიგია, დანაჩენებს ნამდვილად არ ვიცნობ, არც ლუკა ჩხეტიანს ვიცნობ პირადად, სახელები და გვარები ვიცი. ისევე, როგორც თქვენ, მეც ამ ამბის შესახებ ტელევიზიით შევიტყვე. ფაქტობრივი ტყუილია, რომ ეს ადამიანები ჩამოვიდნენ აქციაში მონაწილეობისთვის. ისინი 27- ში, არჩევნების წინა დღეს არიან ჩამოსულები ქვეყანაში, შესაბამისად, 27- 28 ში არავინ იცოდა საერთოდ იქნებოდა თუ არა აქცია“, - განაცხადა გიორგი ვაშაძემ.
ცნობისთვის, გუშინ თბილისში სპეცოპერაციის შედეგად უკრაინის ექვსი და საქართველოს ერთი მოქალაქე დააკავეს.
„გაცნობებთ, რომ დაკავებულია უკრაინის 6 და საქართველოს ერთი მოქალაქე. ოპერატიული ინფორმაციის საფუძველზე შინაგან საქმეთა სამინისტრომ სპეცოპერაცია მიმდინარე წლის 2 დეკემბერს, თბილისში, ლიხაურის ქუჩაზე მდებარე სასტუმრო „გურუსა“ და „ალიანსში“ ჩაატარა.
დაკავებულები არიან უკრაინის მოქალაქეები: ო.ნ., რ.მ., დ.კ. ი.კ., ი.ო., ს.კ. და საქართველოს მოქალაქე ლ.ჩ. სასტუმროს ნომრების ჩხრეკისას ამოღებულია ბერეტას და მაკაროვის სისტემის ცეცხლსასროლი პისტოლეტი, ავტომატური ხელნაკეთი ცეცხლსასროლი იარაღი და სხვადასხვა სახის საბრძოლო მასალა.
ამ ეტაპზე გამოძიება დაწყებულია საქართველოს სსკ-ის 236-ე მუხლის მე-3 და მე-6 ნაწილებით, რაც ჯგუფურად ცეცხლსასროლი იარაღის, საბრძოლო მასალის, ფეთქებადი მოწყობილობის მართლსაწინააღმდეგო შეძენა-შენახვას გულისხმობს.
უკრაინის და საქართველოს მოქალაქეები ქვეყანაში 27 ნოემბერს ჩამოვიდნენ. მოცემულ მომენტში მათი საქართველოში ჩამოსვლის კონკრეტულ მიზნებზე და ამოცანებზე გამოძიება აქტიურად მიმდინარეობს.
შინაგან საქმეთა სამინისტრო და სახელმწიფო უსაფრთხოების სამსახური დაადგენს არის თუ არა კავშირში დაკავებული უკრაინის და საქართველოს მოქალაქეები ქვეყანაში მიმდინარე პოლიტიკურ პროცესებთან. ამის შესახებ საზოგადოებას დამატებით მიეწოდება ინფორმაცია“,- აღნიშნეს შსს-ში
