რასთან დაკავშირებით უნდა შეიქმნას 5-კაციანი ჯგუფი? ეს არის დესტრუქციული ძალა, რომელიც ცდილობს ქვეყანაში შემოიტანოს არეულობა, შემოიტანოს დაპირისპირება, - ამის შესახებ თბილისის მერმა კახა კალაძემ გაერთიანებული ოპოზიციის მოთხოვნასთან დაკავშირებით განაცხადა.
კალაძის თქმით, გაერთიანებული ოპოზიციის წევრები მთელი არჩევნების განმავლობაში პირდაპირ საუბრობდნენ რევოლუციაზე, გადატრიალებაზე, მაგრამ ქართველი ხალხი არის ბრძენი და შესაბამისი პასუხი გაეცა მათ არჩევნებზე.
კალაძემ ამის მაგალითად საქართველოს ყოფილი პრეზიდენტის, მიხეილ სააკაშვილის მოწოდებები მოიყვანა.
„იყო თუნდაც მიხეილ სააკაშვილის მოწოდებები მუქარაზე, არეულობაზე, დესტაბილიზაციაზე საუბრობდა მთელი არჩევნების განმავლობაში. კიდევ არის დამატებითი საკითხები, რომელიც შესაბამის სამსახურებს გააჩნიათ, ეს კიდევ სხვა თემაა", - განაცხადა კალაძემ.
ცნობისთვის, გაერთიანებული ოპოზიცია ითხოვს, შეიქმნას 5-კაციანი საკონსულტაციო ჯგუფი, რომელიც ვადამდელი საპარლამენტო არჩევნების ჩატარების საკითხზე იმსჯელებს.