ზუგდიდის მე-6 საჯარო სკოლის დირექტორზე სავარაუდო ზეწოლასთან დაკავშირებით, "ევროპული საქართველო" განათლების მინისტრს პარლამენტში იბარებს.
პატიის წევრის ოთარ კახიძის განცხადებით, ადმინისტრაციული რესურსის გამოყენებით "ქართული ოცნება" ცდილობდა არჩევნებზე სალომე ზურაბიშვილის მხარდაჭერის მიღებას სკოლის დირექტორებისგან და პედაგოგებისგან.
"მინდა გამოვეხმაურო ზუგდიდის მე-6 საჯარო სკოლის დირექტორის ქალბატონი ია კერზაიას საქმეს. მინდა საზოგადოებას ვუთხრა, რომ "ქართული ოცნების" პოლიტიკური დაკვეთის შესასრულებლად ქალბატონი ია კერზაიაზე ზეწოლა განახორციელა, განათლების სამინისტროს ინსპექტირების სამმართველოს თანამშომლებმა, ნოდარ წამალაშვილმა და ელისო ჯაფარიძემ. მათ აბსოლუტურად უკანონოდ და სამსახურებრივი უფლებამოსილების გადამეტებით აწარმოეს საპროკურორო სტილის დაკითხვები, პირველ და მეორე ტურებს შორის, ზუგდიდის მე -6 საჯარო სკოლის თანამშომლებზე და ამ სკოლის დირექტორზე ქალბატონ ია კერზაიაზე. ეს ქმედებები საჭიროებს დამატებით შესწავლას და რეაგირებას პროკურატურის მხრიდან , ვინაიდან სახეზეა სისხლის სამართლის დანაშაულის ნიშნები ,ჩადენილი ამ ორი ადამიანის მიერ.
ქალბატონი ია არის უმძიმეს მდგომარეობაში, რეანიმაციაში იმყოფება და მას გამოჯამრთელება მინდა ვუსურვო.
მინდა მივმართო განათლების მინისტრს მიხეილ ბატიაშვილს, რომ გამოცხადდეს პარლამენტში "ევროპული საქართველოს" ფრაქციების გაერთიანებულ სხდომაზე და პასუხი გასცეს იმ კითხვებს ,რომელიც არსებობს, როგორც ამ და სხვა უამრავ საქმეზე.
ადმინისტრაციული რესურსის გამოყენებით "ქართული ოცნება" ცდილობდა ამ არჩევნებზე სალომე ზურაბიშვილის მხარდაჭერის მიღებას სკოლის დირექტორებისგან და პედაგოგებისგან.
ამასთანავე, "ევროპული საქართველო" ვსვავთ როგორც ინსპექტირების სამსახურის სამმართველოს უფროსის და ასევე შიდა აუდიტის დეპარტამენტის უფროსის პასუხისმგებლობის საკითხს", - განაცხადა კახიძემ.
ცნობისთვის, რამდენიმე დღის წინ ზუგდიდის მეექვსე საჯარო სკოლის დირექტორის, ია კერზაიას შვილმა ინფორმაცია გაავრცელა, რომ დედამისის მიმართ პოლიტიკური ანგარიშსწორება მიმდინარეობდა.
