გაერთიანებული ოპოზიციის საპრეზიდენტო კანდიდატი, გრიგოლ ვაშაძე, რომელიც არჩევნებში დამარცხდა, აცხადებს, რომ ის იწყებს 50 ათასი კილომეტრის მეორე ნაწილს ანუ საქართველოს შემოვლას.
„სრულიად გულწრფელად გეუბნებით, ნახევრად ხუმრობით, ვიღაცას ჩემთვის რომ ეთქვა, 6 თვის წინ, რომ რუსთაველის პროსპექტზე, პარლამენტის წინ, მურმან დუმბაძესთან, ჩემ მეგობრებთან - პაატა დავითაიასთან, ბაჩუკი ქარდავასთან ერთად მიტინგზე ვიქნებოდი და სიტყვით გამოვიდოდი, არ დავიჯერებდი ამას, არანაირ შემთხვევაში. მაგრამ უკუღმა დაიწყო ყველაფერი. რატომღაც მე იმედი მქონდა, რომ ე.წ „ქართულ ოცნებაში“ გაცილებით უფრო, საღად მოაზროვნე ადამიანები იყვნენ, როლებიც მიხვდებოდნენ, რომ დღევანდელ სოციალურ და ეკონომიკურ სიტუაციაში, პასუხიმგებლობის განაწილება, გაცილებით მეტი დანაკარგია, ვიდრე ის „პრესტიჟი“ და იმის ფანტომური შიში, რომ 2018 წელს წაგებით, 2020 წელს რამეს წააგებ. არასწორი გათვლა მქონდა აბსოლუტურად“, - თქვა ვაშაძემ.
შეგახსენებთ, რომ 2 დეკემბერს, გაერთიანებულმა ოპოზიციამ რუსთაველის გამზირზე, აქცია გამართა. აქციაზე შეკრებილებს სიტყვით გაერთიანებული ოპოზიციის წევრებმა მიმართეს. აქციაზე ჩაერთო საქართველოს ყოფილი პრეზიდენტი მიხეილ სააკაშვილიც. აქციაზე შეკრებილები საპრეზიდენტო არჩევნების შედეგებს არ აღიარებენ და უახლოეს დღეებში აპირებენ მიმართონ სასამართლოს შედეგების ბათილად ცნობის შესახებ. ასევე, ვადამდელ საპარლამენტო არჩევნებს ითხოვენ.
საპრეზიდენტო არჩევნების მეორე ტურში „ქართული ოცნების“ მხარდაჭერილმა კანდიდატმა სალომე ზურაბიშვილმა გაიმარჯვა. გაერთიანებული ოპოზიციის კანდიდატმა გრიგოლ ვაშაძემ განაცხადა, რომ ის არჩევნების შედეგებს არ აღიარებს. საქართველოს ყოფილმა პრეზიდენტმა, მიხეილ სააკაშვილმა მომხრეებს ქუჩაში გამოსვლისა და დაუმორჩილებლობისკენ მოუწოდა. გაერთიანებულმა ოპოზიცია ფილარმონიაში მომხრეებს შეხვდა და 2 დეკემბერს ფართომასშტაბიანი აქცია დაანონსა.
