გაერთიანებული ოპოზიცია ხვალიდან ყველა პოლიტიკურ პარტიასთან კონსულტაციებს იწყებს. ამის შესახებ საპრეზიდენტო არჩევნებში გაერთიანებული ოპოზიციის დამარცხებულმა კანდიდატმა, გრიგოლ ვაშაძემ „კვირის აქცენტებში“ განაცხადა.
„ხვალიდან, არაუგვიანეს ზეგიდან, დავიწყებთ კონსულტაციებს ყველა პოლიტიკურ პარტიასთან, როგორც პარტნიორები, რომ ყველა პოლიტიკურმა პარტიამ, ვისაც ესმის, რომ საქართველოს იმყოფება სამი უძმიმესი კრიზისი პირობებში, გამოიმუშაონ პლატფორმა, მოლაპარაკებების ტაქტიკა და მოლაპარაკებების საგანი, რომ ხელისუფლებამ შეიგნოს ერთი რაღაცა, ზუსტად ისევე სჭირდება დღეს მოლაპარაკება ხელისუფლებას, როგორც ოპოზიციას“,- განაცხადა გრიგოლ ვაშაძემ.
შეგახსენებთ, რომ 2 დეკემბერს, გაერთიანებულმა ოპოზიციამ რუსთაველის გამზირზე, აქცია გამართა. აქციაზე შეკრებილებს სიტყვით გაერთიანებული ოპოზიციის წევრებმა მიმართეს. აქციაზე ჩაერთო საქართველოს ყოფილი პრეზიდენტი მიხეილ სააკაშვილიც. აქციაზე შეკრებილები საპრეზიდენტო არჩევნების შედეგებს არ აღიარებენ და უახლოეს დღეებში აპირებენ მიმართონ სასამართლოს შედეგების ბათილად ცნობის შესახებ. ასევე, ვადამდელ საპარლამენტო არჩევნებს ითხოვენ.
საპრეზიდენტო არჩევნების მეორე ტურში „ქართული ოცნების“ მხარდაჭერილმა კანდიდატმა სალომე ზურაბიშვილმა გაიმარჯვა. გაერთიანებული ოპოზიციის კანდიდატმა გრიგოლ ვაშაძემ განაცხადა, რომ ის არჩევნების შედეგებს არ აღიარებს. საქართველოს ყოფილმა პრეზიდენტმა, მიხეილ სააკაშვილმა მომხრებს ქუჩაში გამოსვლისა და დაუმორჩილებლობისკენ მოუწოდა. გაერთიანებულმა ოპოზიცია ფილარმონიაში მომხრეებს შეხვდა და 2 დეკემბერს ფართომასშტაბიანი აქცია დაანონსა
