დღეს, 3 დეკემბერს, 10:00 საათზე, საქართველოს ეროვნული მუზეუმის აუდიტორიაში (მის. ქ. ფურცელაძის ქ. N 1) გაიმართება სამეცნიერო კონფერენცია, სახელწოდებით „კულტურული მემკვიდრეობა კონფლიქტურ ტერიტორიებზე“.
კონფერენცია ხელოვნების საერთაშორისო ცენტრის ორგანიზებით იმართება. ღონისძიების მხარდამჭერია აფხაზეთის ავტონომიური რესპუბლიკის განათლებისა და კულტურის სამინისტრო, სამხრეთ ოსეთის დროებითი ადმინისტრაცია და საქართველოს ეროვნული მუზეუმი.
ღონისძიებას დაესწრებიან საქართველოს განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, სამხრეთ ოსეთის ადმინისტრაციის ხელმძღვანელი დიმიტრი სანაკოევი და ხელოვნების საერთაშორისო ცენტრის პრეზიდენტი მარიამ დვალიშვილი.
სამეცნიერო კონფერენციის მიზანია ოკუპირებულ ტერიტორიებზე არსებული კულტურული მემკვიდრეობის მოძრავ და უძრავ ძეგლებზე უახლესი ინფორმაციის მიღება და მათ დასაცავად საერთაშორისო გამოცდილების გაზიარება.
