გაერთიანებული ოპოზიციის "ძალა ერთობაშია" საპროტესტო აქცია დასრულდა.
აქცია რუსთაველის გამზირზე, 15:00 საათზე დაიწყო და სამი საათის განმავლობაში გრძელდებოდა.
აქციაზე შეკრებილებს სიტყვით გაერთიანებული ოპოზიციის წევრებმა მიმართეს. აქციაზე ჩაერთო საქართველოს ყოფილი პრეზიდენტი მიხეილ სააკაშვილიც.
აქციის მონაწილეების მთავარი მოთხოვნა ვადამდელი საპარლამენტო არჩევნების ჩატარებაა. როგორც გაერთიანების პრეზიდენტობის კანდიდატმა გრიგოლ ვაშაძემ დღევანდელ აქციაზე განაცხადა, ისინი ხელისუფლებას ვადას 16 დეკემბრამდე აძლევენ, რათა დასხდნენ და ერთად გამონახონ გზა, თუ როგორ გამოვიდეს ქვეყანა კრიზისიდან. მისივე თქმით, სწორედ ხელისუფლების პასუხზე იქნება დამოკიდებული მათი შემდეგი ნაბიჯები.
"ჩვენ ხელისუფლებას ვთავაზობთ, შექმენით სამუშაო ჯგუფი, არ აქვს მნიშვნელობა, დავუშვათ 5 ადამიანის შემადგენლობით, თუ ამდენ კვალიფიციურ პირს მონახავთთქვენთან. ჩვენც, ზუსტად ამავე რაოდენობით შევქმნით ჩვენ დელეგაციას და სამოქალაქო საზოგადოების დაკვირვების ქვეშ, ცივილიზებულად, ევროპულად, სამართლებრივად დავჯდეთ და ერთად გამოვიდეთ ამ პოლიტიკური კრიზისიდან. ვადას გაძლევთ 16 დეკემბრამდე. სწორედ ამ პასუხზე იქნება დამოკიდებული ჩვენი შემდეგი ნაბიჯები, მაგრამ უმორჩილესი თხოვნა მაქვს ბატონო ე.წ. ხელისუფლება ახლა ვაი-ვიშს ნუ ატეხავთ და კიდევ ელჩების გამოგზავნას ნუ დაიწყებთ ჩემთან. არც კონსტიტუციის ფარგლებიდან გავალთ, არც კანონს დავარღვევთ, არც თქვენთან მუშტი-კრივში ჩავერთვებით, იმდენი განათლება, ჭკუა და გამოცდილება გვაქვს, რომ სამართლებრივად დაგამარცხოთ. სამართლებრივად დაგამარცხებთ ქართველი ხალხი. ჩვენი გაბრაზება გამოიხატება იმაში, რომ პროტესტი იქნება უწყვეტი, სანამ არ მივაღწევთ იმას, რომ ქართველი ხალხის ხმა იქნეს გაგონებული", - განაცხადა ვაშაძემ.
გრიგოლ ვაშაძის განცხადებით, ისინი საპრეზიდენტო არჩევნებს არ აღიარებენ და მისი ბათილად ცნობის მოთხოვნით სასამართლოს მიმართავენ.
„ჩვენ არჩევნებს ჩატარებულად არ ვაღიარებთ და მის შედეგებს არ ვცნობთ. საქართველოს პრეზიდენტი არ ჰყავს. პრეზიდენტი ჰყავს ქურდულ ოცნებას და ბიძინა ივანიშვილს. ამჟამად გაერთანებული ოპოზიციის და ჩვენი პარტნიორების იურისტები, დამიჯეერთ, ძალიან მაღალკვალიფიკაციური იურისტები გვყავს, ამზადებენ სარჩელს, რომელსაც ჩვენ შევიტანთ სასამართლოში მოთხოვნით ეს არჩევნები იქნას ცნობილი ბათილად. ამას არ შევურიგდებით“, - აღნიშნა გრიგოლ ვაშაძემ
