გაერთიანებული ოპოზიციის "ძალა ერთობაშია" ერთ-ერთი წევრის, მურმან დუმბაძის განცხადებით, დღეს რუსთაველის გამზირზე მინიმიტინგია და არა ორგანიზებული მიტინგი.
როგორც რუსთაველის გამზირზე მიმდინარე აქციაზე დუმბაძემ განაცხადა, ორგანიზებული მიტინგის შემთხვევაში, მთელი საქართველო გამოვა გარეთ.
„საიდუმლოს გეტყვით, დღევანდელი მიტინგი არ არის ორგანიზებული. ორგანიზებული მიტინგის შემთხვევაში, მთელი საქართველო გამოვა გარეთ. მიტინგი არ არის ორგანიზებული, ეს არის თვითდინებით მოსული მოსახლეობა, უბრალოდ ფილარმონიის გამოტანა გარეთ, მინიმიტინგი რუსთაველის ქუჩაზე, მეტი არაფერი“, – განაცხადა მურმან დუმბაძემ.
ცნობისთვის, რუსთაველის გამზირზე, გაერთიანებული ოპოზიციის აქცია მიმდინარეობს. შეკრებილები საპრეზიდენტო არჩევნების შედეგებს აპროტესტებენ და ვადამდელი საპარლამენტო არჩევნების ჩატარებას მოითხოვენ.
შეგახსენებთ, რომ საპრეზიდენტო არჩევნების მეორე ტურში „ქართული ოცნების“ მხარდაჭერილმა კანდიდატმა სალომე ზურაბიშვილმა გაიმარჯვა. გაერთიანებული ოპოზიციის კანდიდატმა გრიგოლ ვაშაძემ განაცხადა, რომ ის არჩევნების შედეგებს არ აღიარებს. საქართველოს ყოფილმა პრეზიდენტმა, მიხეილ სააკაშვილმა მომხრებს ქუჩაში გამოსვლისა და დაუმორჩილებლობისკენ მოუწოდა. გაერთიანებულმა ოპოზიცია ფილარმონიაში მომხრეებს შეხვდა და 2 დეკემბერს ფართომასშტაბიანი აქცია დაანონსა. მათ განაცხადეს, რომ არჩევნების შედეგებს არ აღიარებენ და ვადამდელი საპარლამენტო არჩევნების მოთხოვნით, 2 დეკემბერს, აქციას გამართავენ
“ევროპული საქართველოს“ ერთ-ერთმა ლიდერმა დავით ბაქრაძემ პარტიის სახელით დღეს განცხადება გააკეთა, რომ გაერთიანების "ძალა ერთობაშია" მიერ კვირას დაგეგმილ საპროტესტო აქციას არ შეუერთდება. მისი თქმით, საზოგადოება გაიზარდა და აჩვენა, რომ ცვლილებებისთვის აუცილებელი აღარ არის ქუჩა, რევოლუცია და ბარიკადი.
ევროპული საქართველოს განცხადების შემდეგ, სამაუწყებლო კომპანია რუსთავი 2-ის გენერალურმა დირექტორმა ნიკა გვარამიამ „ევროპული საქართველოს“ კაბინეტის პარტია უწოდა.
მოგვიანებით, ევროპული საქართველოს ლიდერმა გიგი უგულავამ განაცხადა, რომ ის მიდის აქციაზე.
