არ იქნება სალომე ზურაბიშვილი ჩვენი პრეზიდენტი. ეს არის ღირსების საკითხი, - ამის შესახებ "ნაციონალური მოძრაობის" პოლიტიკური საბჭოს თავმჯდომარე ნიკა მელიამ რუსთაველის გამზირზე მიმდინარე აქციაზე განაცხადა.
მისი თქმით, ხელისუფლებამ იკადრა და სოციალურად დაუცველებს ეუბნებოდნენ, რომ თუ ხმას არ მისცემდნენ მათ მიერ მხარდაჭერილ კანდიდატს, დახმარებას მოუხსნიდნენ.
"პედაგოგებს და ბაღის თანამშრომლებს ეუბნებოდნენ, თუ სალომე ზურაბიშვილი არ მოიგებს იმ უბანს, სადაც მუშაობთ, სამსახურიდან გაგიშვებთო. ეს იყო ტოტალური გაყალბება. ერთმა ქალბატონმა მითხრა, რომ სალომე ზურაბიშვილი რომ მოვხაზე ვიტირეო. პოლიციის უფროსი და კრიმინალი ერთად აყალბებდა არჩევნებს. არ იქნება სალომე ზურაბიშვილი ჩვენი პრეზიდენტი. ეს არის ღირსების საკითხი", - განაცხადა ნიკა მელიამ.
ცნობისთვის, რუსთაველის გამზირზე, გაერთიანებული ოპოზიციის აქცია მიმდინარეობს. შეკრებილები საპრეზიდენტო არჩევნების შედეგებს აპროტესტებენ და ვადამდელი საპარლამენტო არჩევნების ჩატარებას მოითხოვენ.
შეგახსენებთ, რომ საპრეზიდენტო არჩევნების მეორე ტურში „ქართული ოცნების“ მხარდაჭერილმა კანდიდატმა სალომე ზურაბიშვილმა გაიმარჯვა. გაერთიანებული ოპოზიციის კანდიდატმა გრიგოლ ვაშაძემ განაცხადა, რომ ის არჩევნების შედეგებს არ აღიარებს. საქართველოს ყოფილმა პრეზიდენტმა, მიხეილ სააკაშვილმა მომხრებს ქუჩაში გამოსვლისა და დაუმორჩილებლობისკენ მოუწოდა. გაერთიანებულმა ოპოზიცია ფილარმონიაში მომხრეებს შეხვდა და 2 დეკემბერს ფართომასშტაბიანი აქცია დაანონსა. მათ განაცხადეს, რომ არჩევნების შედეგებს არ აღიარებენ და ვადამდელი საპარლამენტო არჩევნების მოთხოვნით, 2 დეკემბერს, აქციას გამართავენ
“ევროპული საქართველოს“ ერთ-ერთმა ლიდერმა დავით ბაქრაძემ პარტიის სახელით დღეს განცხადება გააკეთა, რომ გაერთიანების "ძალა ერთობაშია" მიერ კვირას დაგეგმილ საპროტესტო აქციას არ შეუერთდება. მისი თქმით, საზოგადოება გაიზარდა და აჩვენა, რომ ცვლილებებისთვის აუცილებელი აღარ არის ქუჩა, რევოლუცია და ბარიკადი.
ევროპული საქართველოს განცხადების შემდეგ, სამაუწყებლო კომპანია რუსთავი 2-ის გენერალურმა დირექტორმა ნიკა გვარამიამ „ევროპული საქართველოს“ კაბინეტის პარტია უწოდა.
მოგვიანებით, ევროპული საქართველოს ლიდერმა გიგი უგულავამ განაცხადა, რომ ის მიდის აქციაზე.
