ინგლისურმა კომპანია "ჰესტოკ ლიმიტედმა" ბათუმში გასართობი ცენტრის მშენებლობა დაიწყო. გასართობი ცენტრის პარალელურად კომპანია საბაგიროს მშენებლობასაც გეგმავს. ცენტრი ფერიის მთაზე შენდება და ბათუმი ფერიის მთასთან პირდაპირ დაკავშირებას საბაგირო გზის საშუალებით შეძლებს.
წინასწარი გათვლებით, გასართობი ცენტრისა და საბაგიროს მშენებლობა კომპანიას 50 მლნ ევრო დაუჯდება.
"ჰესტოკ ლიმიტედის" შვილობილმა "ჰესტოკ ბათუმმა" ფერიის მთაზე 16 ჰა მიწა სიმბოლურ ფასად, 2009 წელს იყიდა, სადაც გრანდიოზული პროექტის მშენებლობა სახელმწიფოსა და ინვესტორს შორის გაფორმებული ხელშეკრულების თანახმად 2012 წლისთვის უნდა დაასრულოს.
"ჰესტოკ ლიმიტედი" ბათუმში მეორე პროექტსაც ახორციელებს, რაშიც 90 მლნ ევროს მოცულობის ინვესტიციას განახორციელებს. "ჰესტოკ ლიმიტედის" შვილობილმა "ტურინვესტმა" ბათუმში სასტუმრო "ჰილტონის" მშენებლობა უკვე დაიწყო. 23-სართულიანი სასტუმრო კომპლექსი 250 ნომერზე იქნება გათვლილი და მისი მშენებლობა 2012 წლისთვის უნდა დასრულდეს. სასტუმრო კომპლექსში
სასტუმრო ნომრების გარდა რესტორნები, ბარები, ბუტიკები და პოდიუმი განთავსდება.