აზერბაიჯანი ვერასოდეს შეძლებს გახდეს რუსეთის ისეთივე ერთგული მოკავშირე როგორიც სომხეთია. ეს განცხადება რუსეთის მეცნიერებათა აკადემიის საერთაშორისო ურთიერთობათა და მსოფლიო ეკონომიკის ინსტიტუტის წამყვანმა მეცნიერ-თანამშრომელმა ალექსანდრე კრილოვმა რუსეთის პრეზიდენტის დიმიტრი მედვედევის ბაქოში ვიზიტის კომენტირებისას გააკეთა.
"რუსული პოლიტიკა კავკასიაში შენდება უპირველეს ყოვლისა სომხეთთან თანამშრომლობით. მოსკოვს მართალია სურს აზერბაიჯანთან ურთიერთობების განვითარება, მაგრამ აქ საუბარი არ მიდის სამხედრო თანამშრომლობაზე", _ აცხადებს კრილოვი.
მისივე თქმით, მიუხედავად იმისა, რომ ეკონომიკური თვალსაზრისით აზერბაიჯანი გაცილებით უფრო მიმზიდველია რუსეთისათვის ვიდრე სომხეთი, სამაგიეროდ ერევანის პოლიტიკა გაცილებით უფრო პრორუსულად განწყობილია.
"აზერბაიჯანი ვერასოდეს გახდება ადეკვატური შემცვლელი ჩვენი მოკავშირე სომხეთისა სამხედრო-პოლიტიკურ ურთიერთობებში. აზერბაიჯანი მრავალვექტორულ პოლიტიკას ატარებს და ურთიერთობს თურქეთთან, ევროკავშირთან და ამერიკასთან", _ აცხადებს კრილოვი და აღნიშნავს, რომ სომხეთი კი აზერბაიჯანისაგან განსხვავებით უფრო პრორუსულ პოლიტიკას ატარებს და "გაცვლაზე საუბარიც კი არ არის".
"ისევე როგორც ადრე შეუძლებელი იყო აფხაზეთისა და სამხრეთ ოსეთის გაცვლაზე საუბარი საქართველოსთან მეგობრობის სანაცვლოდ. აფხაზეთისა და სამხრეთ ოსეთის საქართველოსათვის ჰიპოტეთიკურად დათმობის შემთხვევაში საქართველო რუსეთის საიმედო მოკავშირე არასოდეს გახდება", _ აცხადებს კრილოვი.
