ჩვენ ამ არჩევნებს ვიგებთ, სწორედ ამით არის გამოწვეული ხელისუფლების ისტერიკა, - ამის შესახებ გაერთიანებული ოპოზიციის საპრეზიდენტო კანდიდატმა გრიგოლ ვაშაძემ განაცხადა, რომელმაც საკუთარი არჩევანი ქუთაისში დააფიქსირა.
მისი თქმით, უამრავი საჩივარი და შენიშვნებია უკვე, რადგან მომზადებული იყვნენ გაყალბებისთვის.
„როგორც მე ვიცი, აქტივობა ნორმალურია. მე მინდა კიდევ მივმართო ამომრჩეველს, ძალიან გთხოვთ, გადადეთ ყველა საქმე და მობრძანდით არჩევნებზე, რადგან საქართველოს და თქვენი შვილების, შვილიშვილების მომავალს ირჩევთ. ეს თქვენი კონსტიტუციური უფლება და ვალდებულებაა.
რაც შეეხება გაერთიანებულ ოპოზიციას, ჩვენ ამ არჩევნებს ვიგებთ, სწორედ ამით არის გამოწვეული ხელისუფლების ისტერიკა. მე ველოდები ჩვენს გამარჯვებას, იქნება ეს პირველ ტურში, თუ მეორეში, ამას ამომრჩეველი გადაწყვეტს. დამარცხება არ იქნება. ვნახოთ, კიდევ რამდენი საჩივარი დაგროვდება. ერთი რამ ვიცი, ხელისუფლებას ძალიან მწვავე შეკითხვებზე მოუწევს პასუხების გაცემა“, - განაცხადა ვაშაძემ.
