სასჯელაღსრულების ყოფილი მინისტრი კახა კახიშვილი მირზა სუბელიანის განცხადებებს მაღალჩინოსნების კომპრომატების შესახებ, მის მძიმე ფსიქოლოგიურ მდგომარეობას უკავშირებს, რომელიც მისი თქმით, პატიმრობით არის გამოწვეული.
რუსთავი 2-ის გავრცელებულ ჩანაწერში, მირზა სუბელიანის ნათქვამზე, რომ კახა კახიშვილი სოზარ სუბარის წინააღმდეგ ლალი მოროშკინას დახმარებით მოქმედებდა, კახიშვილი ამბობს, რომ მას კომინიკაციის საშუალება ისედაც ჰქონდა, რადგან მედიისთვის გახსნილი იყო.
„რად მინდოდა მე რაღაცის დავალება, როდესაც 2013 წელს ვიყავი ექსპერტი და ჩემი გახსნილობა საზოგადოების მიმართ გახსოვთ და თუ რამეს ვფიქრობდი მაგის საშუალება მქონდა, რომ მედიასაშუალებებში ჩემი აზრი გამოქვეყნებულიყო. არალოგიკურია, რომ მე მაშინ, როდესაც გახლდით აქტიური, კომუნიკაბელური ექსპერტი და მედიასთან აქტიური კომუნიკაცია მქონდა, ლალი მოროშკინას მეშვეობით რაღაცის თქმა ნამდვილად არ დამჭირდებოდა“, - განაცხადა კახიშვილმა.
ცნობისთვის, რუსთავი 2-მა პროკურატურის ყოფილი მაღალჩინოსანის მირზა სუბელიანისა და დეპუტატ ვიქტორ ჯაფარიძის ახალი ფარული ჩანაწერი გაავრცელა, სადაც სუბელიანი მმართველი გუნდის იმ წევრებზე საუბრობს, ვისზეც კომპრომატები აქვს. სუბელიანი ჩანაწერში ამბობს, რომ თუ ციხეში სუბელიანი პრივილეგიებით ვერ ისარგებლებდა, მაშინ კახიშვილის კომპრომატებს გამოუქვეყნებდა. სუბელიანი გავრცელებულ ჩანაწერში სააკაშვილის ლიკვიდაციასაც ახსენებს.
