საქართველოს ვიცე-პრემიერის, გიორგი ბარამიძის შეფასებით, რუსეთის მიერ საქართელოს დანაწევრების და ტერიტორიების მიტაცების მცდელობა დანაშაულია არა მხოლოდ ქართველი ერის, არამედ მთელი კაცობრიობის წინაშე. ამის შესახებ ბარამიძემ მთავრობის სხდომის დაწყების წინ, საქართველოს ერთიანობის დღის დაწესების ორი წლისთავის შეფასებასთან დაკავშირებით განაცხადა.
"ეს არ არის მხოლოდ ფორმალობა. ქართველები ყოველდღიურად ერთად არიან და საქართველო საუკუნეების განმავლობაში ჩვენი ქვეყნის დამოუკიდებლობასა და თავისუფლების დასაცავად ყოველთვის ერთ პოზიციაზე იდგა. ჩვენ ღმერთმა გვარგუნა ულამაზესი ქვეყანა, რომელიც ღირსია იყოს თავისუფალი და ერთიანი იმ საზღვრებში, რომელიც ცივილიზებული სამყაროს მიერ არის დამტკიცებული. რუსეთი შეეცადა ამ სახელმწიფოს დანაწევრებას და ტერიტორიების მიტაცებას და ეს არის უსამართლობა არა მხოლოდ ქართველი ერის წინაშე, ასევე კაცობრიობის წინაშეც" - აღნიშნა ბარამიძემ.
მისივე თქმით, ხელისუფლება ყველაფერს აკეთებს იმისათვის, რომ ქვეყანა ეკონომიკურად ფეხზე დააყენოს და მიხედოს უამრავ გაჭირვებულ ადამიანს და დევნილს, რომელებიც საკუთარი სახლებიდან უკანონოდ არიან გამოდევნილები.
შეგახსენებთ, რომ ამ წუთებში სახელმწიფო კანცელარიაში მთავრობის სხდომა მიმდინარეობს. მინისტრები სხდომაზე 29 საკითხს განიხილავენ.
