ჩვენ გვაქვს ჩვენი შიდა კვლევა და ამ შიდა კვლევის თანახმად, სალომე ზურაბიშვილი პირველივე ტურში გაიმარჯვებს საპრეზიდენტო არჩევნებში,- ამის შესახებ საქართველოს პარლამენტის თავმჯდომარემ განაცხადა.
ირაკლი კობახიძის თქმით, მმართველი გუნდის ამოცანაა, „ერთიანი ნაციონალური მოძრაობისა" და „ევროპული საქართველოს" კანდიდატებმა, ჯამში, ხმების 27 %-ზე მეტი ვერ მიიღონ.
„ასეთი კვლევები ჩვენ მუდმივად გვახსოვს არჩევნებიდან, თუმცა, შემდეგ გვახსოვს არჩევნებიც, არჩევნების შედეგებიც, ყოველთვის. მე შემიძლია გითხრათ, რომ ჩვენ გვაქვს ჩვენი შიდა კვლევა და ამ შიდა კვლევის თანახმად, სალომე ზურაბიშვილი პირველივე ტურში გაიმარჯვებს საპრეზიდენტო არჩევნებში. ამოცანა არის ჩვენთვის რა, „ნაციონალური მოძრაობის" ორივე კანდიდატმა ერთად აიღო 27%-ი 2017 წლის არჩევნებში, მანამდე 27%-ი აიღო „ნაციონალურმა მოძრაობამ" 2016 წლის არჩევნებში. ჩვენი ამოცანაა, რომ ამ 27%-ს არ გასცდეს „ნაციონალური მოძრაობა", რომელსაც აქვს უამრავი დანაშაული ჩადენილი საქართველოს წინაშე და მთავარი დანაშაული უკავშირდება, რა თქმა უნდა, 2008 წლის ომს, როდესაც „ნაციონალურმა მოძრაობამ", სააკაშვილმა, ჩააბარეს რუსეთს ჩვენი ორი ისტორიული რეგიონი. ეს არის მათი უმძიმესი დანაშაულის შედეგი",- განაცხადა პარლამენტის თავმჯდომარემ.
ჟურნალისტის კითხვის პასუხად, ირაკლი კობახიძე კომპანია „ედისონ რისერჩის" კვლევის შედეგებსაც გამოეხმაურა.
„ეს არის „ნაციონალური მოძრაობის" კვლევა, ჩვენ ჩვენს შიდა კვლევებს არ ვასაჯაროებთ, რაც არის ლოგიკური, იმიტომ, რომ, ბუნებრივია, „ქართული ოცნების" კვლევა ვერ იქნება ფართო საზოგადოებისთვის დასკვნების გამოტანის საფუძველი, მაგრამ „ნაციონალური მოძრაობა" რომ აქვეყნებს თავის კვლევებს, მათ აქვთ, არ ვიცი, ალბათ რაღაც იაფფასიანი გათვლა, რომ შეიძლება ამან რაიმე გავლენა მოახდინოს საზოგადოებაზე. ბუნებრივია, ყველამ იცის, რომ „ნაციონალური მოძრაობის" კვლევა, ეს არის, „ნაციონალური მოძრაობის" კვლევა",- განაცხადა პარლამენტის თავმჯდომარემ.
ცნობისთვის, „რუსთავი2“-ის დაკვეთით, საერთაშორისო ორგანიზაცია „Edison Research"-ის მიერ ჩატარებული კვლევის მიხედვით, გაერთიანებული ოპოზიციის „ძალა ერთობაშია“ საპრეზიდენტო კანდიდატ გრიგოლ ვაშაძე ხმას 22% მისცემდა.
შეკითხვაზე - დღეს რომ არჩევნები იყოს, ვის მისცემდით ხმას? - 18% ამბობს, რომ „ევროპული საქართველოს“ საპრეზიდენტო კანდიდატ დავით ბაქრაძეს.
„ქართული ოცნების“ მიერ მხარდაჭერილ კანდიდატს სალომე ზურაბიშვილს ხმას არჩევნებზე გამოკითხულთა 15% მისცემდა.
