მთავარი რასაც ეს კვლევა ადასტურებს არის ის, რომ თუ რამდენად არაპოპულარულია "ქართული ოცნების" კანდიდატი ქალბატონი სალომე ზურაბიშვილი, - ამის შესახებ "ევროპული საქართველოს" პრეზიდენტობის კანდიდატმა დავით ბაქრაძემ "რუსთავი 2"-ის მიერ გამოქვეყნებულ პოლიტიკურ რეიტინგებთან დაკავშირებით განაცხადა, რომელიც Edison research-მა ჩაატარა.
„დღეს ჩვენი ამოცანაა ბოლომდე მივიყვანოთ საქმე, გამარჯვება არის ძალიან რეალური, ცვლილებები არის ძალიან რეალური, ამიტომ ოპოზიციის ამოცანა არის ვიმუშავოთ კოორდინირებულად, არ მოვახდინოთ ერთმანეთზე თავდასხმები და მთლიანად ვკონცენტრირდეთ ქალბატონ ზურაბიშვილზე, არ მივცეთ საშუალება ქართულ ოცნებას, რომ ადმინისტრაციული რესურსის გამოყენებით გაიყვანოს მეორე ტურში კანდიდატი, რომელიც დღეს არავის არ მოწონს, ამას ადასტურებს ეს კვლევა და სწორედ ეს არის ჩვენო როგორც ოპოზიციის ამოცანა. ვიმუშავოთ კოორდინირებულად, ვიმუშავოთ ერთმანეთზე თავდასხმების გარეშე და ქართველ ხალხთან ერთად, ჩვენს ამომრჩეველთან ერთად მივაღწიოთ გამარჯვებას და მივაღწიოთ რეალურ ცვლილებებს რომელსაც ელოდება ჩვენი საზოგადოება“, - განაცხადა დავით ბაქრაძემ.
ცნობისთვის, „რუსთავი2“-ის დაკვეთით, საერთაშორისო ორგანიზაცია „Edison Research"-ის მიერ ჩატარებული კვლევის მიხედვით, გაერთიანებული ოპოზიციის „ძალა ერთობაშია“ საპრეზიდენტო კანდიდატ გრიგოლ ვაშაძე ხმას 22% მისცემდა.
შეკითხვაზე - დღეს რომ არჩევნები იყოს, ვის მისცემდით ხმას? - 18% ამბობს, რომ „ევროპული საქართველოს“ საპრეზიდენტო კანდიდატ დავით ბაქრაძეს.
„ქართული ოცნების“ მიერ მხარდაჭერილ კანდიდატს სალომე ზურაბიშვილს ხმას არჩევნებზე გამოკითხულთა 15% მისცემდა.
