ყვარლის რაიონის სოფელ ახალსოფელში მცხოვრები მეფუტკრეები ხელისუფლებისგან დახმარებას ითხოვენ. როგორც მეფუტკრეებმა კახეთის საინფორმაციო ცენტრს განუცხადეს, ახალსოფელში ტყის მასობრივი ჩეხვა თუ არ შეჩერდა, ფუტკარი შიმშილისგან გაწყდება.
"გასულ წელს ფუტკრის სამოცი ოჯახიდან 1,5 ტონა თაფლი ავიღე. წელსაც იმდენივე ფუტკარი მყავს და 1 ტონა მოსავალიც ვერ მივიღე. ახალსოფელში ტყის უმოწყალო ჩეხვა დროულად თუ არ შეჩერდა, ფუტკარი შიმშილისგან გაწყდება. ცაცხვის ხეები მასობრივად არის დაჭრილი და რაც დარჩა, იმასაც ჭრიან. არადა, ფუტკარი ძირითადად ცაცხვის ყვავილით იკვებება", - აღნიშნა მერაბ კიკილაშვილმა.
ყვარლის მუნიციპალიტეტის გამგებლის ლევან გამსახურდიას განცხადებით, ახალსოფლის ტყეში ხე - ტყის დამზადების ლიცენზია იტალიურ კომპანიას აქვს შეძენილი, თუმცა სამასალე ხეების მოჭრა არ ხდება. „საშეშედ რას ჭრის ხალხი, ვერ გეტყვით", - განაცხადა ყვარლის გამგებელმა.
მეფუტკრეები გარემოს დაცვის ინსპექციის კახეთის ბიუროსგან კონტროლის გააქტიურებას ითხოვენ.