თუკი, ამ მასშტაბის და მნიშვნელობის გახმაურებულ საქმეზე შეიძლება ამდენი პრობლემა იყოს გამოძიებაში, იოლად შეგვიძლია წარმოვიდგინოთ გაუხმაურებელ საქმეებში რამდენი ტიპის პრობლემა შეიძლება არსებობდეს, - განაცხადა ჟურნალისტებთან საია-ს თავმჯდომარემ, სულხან სალაძემ.
ის ხორავას ქუჩაზე მომხდარი მკვლელობის საქმეზე შექმნილი პარლამენტის დროებითი საგამოძიებო კომისიის წევრებს შეხვდა.
"ამ დოკუმენტით ცალსახად იკვეთება, რომ გამოძიებას პრობლემები ნამდვილად ჰქონდა. სხვა თემაა ამას მოჰყვება, თუ არა ახალი გამოძიება და ეს ნაწილი გახდება თუ არა საგამოძიებო ორგანოებისთვის დამატებითი წყარო, რითიც ისინი იხელმძღვანელებენ, მაგრამ ძალიან ბევრი გარემოება, რომელზეც საგამოძიებო კომისია დასკვნაში საუბრობს, დამაფიქრებელია და მსვლელობის მიცემას საჭიროებს.
მაგალითად, კონკრეტული საგამოძიებო მოქმედებების არჩატარებასთან დაკავშირებული საკითხები. რეალურად შეიძლება ვთქვათ, რომ საგამოძიებო კომისიამ გვაჩვენა რამდენად დიდია ზოგადად გამოძიებაში პრობლემები.
თუკი, ამ მასშტაბის და მნიშვნელობის გახმაურებულ საქმეზე შეიძლება ამდენი პრობლემა იყოს გამოძიებაში, იოლად შეგვიძლია წარმოვიდგინოთ გაუხმაურებელ საქმეებში რამდენი ტიპის პრობლემა შეიძლება არსებობდეს", - განაცხადა სალაძემ.
როგორც ის განმარტავს, მნიშვნელოვანია თუ როგორი რეაგირება ექნება პარლამენტს კომისიის მიერ მომზადებულ დასკვნაზე.
"ძალიან დიდი მნიშვნელობა ექნება, ამ დასკვნის შემდეგ, თუ როგორი რეაგირება ექნება პარლამენტს. დადგენილება იქნება თუ არა პარლამენტის მხრიდან მიღებული და რა აისახება ამ დადგენილებაში", - განაცხადა სალაძემ.
ის კონკრეტული ძალოვანების პოლიტიკურ პასუხისმგებლობაზეც საუბრობს.
"თუ ბატონი შოთაძე მუდმივად იყო ინფორმირებული და ის აძლევდა დავალებებს საგამოძიებო მოქმედებებთან დაკავშირებით, რა თქმა უნდა, ეს შემდგომი შესწავლის საკითხია", - დასძენს სალაძე.
