კითხვები არსებობს კომისიის დასკვნის ორივე ვერსიასთან დაკავშირებით, - განაცხადა ჟურნალისტებთან საია-ს თავმჯდომარემ, სულხან სალაძემ.
ის პარლამენტის დროებითი საგამოძიებო კომისიის წევრებს ხვდება. როგორც სალაძე განმარტავს, ორივე დასკვნასთან დაკავშირებით კითხვები აქვს, რასაც დღევანდელ შეხვედრაზე გააჟღერებს.
"ქართული ოცნების" მიერ მომზადებული კომისიის დასკვნა არის ზოგადი ხასიათის, ეს დასკვნა არ გამორიცხავს გარკვეული ტიპის დარღვევებს მთელ ამ პროცესში, თუმცა, პრაქტიკულად გამორიცხავს ვინმეს პააუხისმგებლობის დაყენებას და ამ უფლებამოსილებას თავიდან ბოლომდე გამოძიებას ანიჭებს. ეჭვი მაქვს ეს არც დადგენილების პროექტში არ იქნება ასახული, იმ ფორმით რომ შემდგომში ვინმეს მიმართ პასუხისმგებლობის საკითხი დადგეს.
რაც შეეხება საპარლამენტო უმცირესობის მომზადებულ დასკვნას, ეს დასკვნა გაცილებით მოცულობითია და ბევრი საინტერესო დეტალია. პირველი 6 რეკომენდაცია განსაკუთრებით მნიშვნელოვანია თუ რა მოხდა ხორავას ქუჩაზე და რა პრობლემები შეიძლებოდა გამოძიებაში ყოფილიყო. რაც შეეხება დანარჩენ რეკომენდაციებს, მთავარი პროკურორის შერჩევის წესს, სისხლის სამართლის მასალების გაცნობას, ამ ტიპის საქმეებზე სხვა ფორმატი უნდა იყოს გამოყენებული პარლამენტში და არა საგამოძიებო კომისიის ფორმატი.
ამ შეხვედრაზე დავსვამ კითხვებს, თუ რატომ მოხვდა რიგი საკითხები ამ დასკვნაში, მაგრამ ერთი რამ ფაქტია, ის მნიშვნელოვანი კითხვა რაც თავიდანვე კომისიის წინაშე იდგა, იყო თუ არა პრობლემები, ვფიქრობ, საპარლამენტო უმცირესობის მიერ მომზადებულმა დასკვნამ ნამდვილად გასცა პასუხი, რომ დიახ, გამოძიებაში იყო პრობლემები", - განაცხადა სალაძემ.
ამ წუთებში, პარლამენტის დროებითი საგამოძიებო კომისია არასამთავრობო ორგანიზაციის წარმომადგენლებს ხვდება. სხდომას უმრავლესობა არ ესწრება.
