იუსტიციის მინისტრი ნაცვლად იმისა, რომ გულშემატკივრობდეს სამართლის დაცვას, დამნაშავეთა დასჯას, გულშემატკივრობდეს დაზარალებულებსა და მოკლულთა ოჯახებს, ნაცვლად ამისა ის თანამდებობას პოლიტიკურ ოპონენტებზე თავდასასხმელად იყენებს და ამბობს, რომ „ევროპული საქართველო“ უდანაშაულო ადამიანების დასჯას ითხოვს, თანაც ევროკონვენციის დარღვევით, ამის შესახებ „ევროპული საქართველოს“ წევრმა სერგი კაპანაძემ თეა წულუკიანის იმ განცხადებასთან დაკავშირებით აღნიშნა, სადაც მინისტრი პარტიას საგამოძიებო კომისიის მუშაობის ფორმატში ევროკონვენციის დარღვევაში ადანაშაულებს.
დროებითი საგამოძიებო კომისიის თავმჯდომარის განცხადებით, კომისიამ მუშაობის პროცესში გამოავლინა, რომ მირზა სუბელიანის ახლობლებს ხელს აფარებდნენ საგამოძიებო უწყებები და მათ შორის ყოფილი მთავარი პროკურორი.
„საგამოძიებო კომისიამ მუშაობის პროცესში დააგინა, რომ საგამოძიებო უწყებები მირზა სუბელიანის ახლობლებს მფარველობდნენ. მათ შორის იყო შოთაძეც, რომელიც წულუკიანის დანიშნული იყო და იუსტიციის მინისტრი მას ბოლო დღემდე კბილებით იცავდა. გავეცით რეკომენდაცია, რომ უნდა დაისაჯოს ყველა ის პირი, რომელიც დანაშაულია დაფარვაში მონაწილეობდა, მათ შორის ყოფილი მთავარი პროკურორიც. ჩვენ ასევე გავეცით რეკომენდაცია წულუკიანის მისამართით, რომ აუცილებელია დადგეს მისი პოლიტიკური პასუხისმგებლობის საკითხიც“,- განაცხადა სერგი კაპანაძემ.
ცნობისთვის, თეა წულუკიანი ხორავას ქუჩის საქმეზე „ევროპული საქართველოს“ მიერ მომზადებულ დასკვნას არასერიოზულ დოკუმენტს უწოდებს.
