საქართველო გახდება პირველი ქვეყანა, რომელშიც ევროპის ფარგლებს გარეთ დაფუძნდა „აღმოსავლეთ პარტნიორობის“ ევროპული სკოლა და ძალიან სასიხარულოა, რომ ეს პირველად სწორედ საქართველოში მოხდა, – ამის შესახებ საქართველოს პრემიერ-მინისტრმა მამუკა ბახტაძემ ევროპული სკოლის გახსნის ცერემონიაზე განაცხადა.
მისი თქმით, ჩვენს ქვეყანაში დღეს მნიშვნელოვანი პროექტი იწყება – „აღმოსავლეთ პარტნიორობის“ პირველი ევროპული სკოლა, ეს არის სიახლე არამარტო საქართველოსთვის, არამედ მთლიანად, მთელი რეგიონისთვის.
„მივესალმები ჩვენს სტუდენტებს, რომლებიც გვამხნევებენ და მინდა, სრული პასუხისმგებლობით განვაცხადო, რომ სტუდენტების ინტერესი და ახალგაზრდების ინტერესი არის ყველაზე მთავარი პრიორიტეტი ჩვენთვის, ისევე, როგორც განათლების სისტემის რეფორმა. განათლების სისტემის რეფორმირება გახლავთ ის უმთავრესი პრიორიტეტი, რომელიც დღეს ჩვენ გვაქვს და მინდა, სრული პასუხისმგებლობით აღვნიშნო, რომ დღევანდელი პროექტი არის ჩვენი რეფორმის უმნიშნველოვანესინაბიჯი“, – განაცხადა მამუკა ბახტაძემ, რომელმაც აქვე აღნიშნა, რომ დემოკრატიის განვითარებისა და სტაბილურობის მიღწევის გზაზე საქართველოს მუდმივი მხარდაჭერა აქვს ევროკავშირიდან და პარტნიორებისგან.
მან იოჰანეს ჰანს მადლობა გადაუხადა.
„აღმოსავლეთ პარტნიორობის ინიციატივა ჩვენ სწორედ ამ დიდ შესაძლებლობას გვთავაზობს. მინდა, მადლობა გადავუხადო იოჰანეს ჰანს. ეს იყო სწორედ მისი იდეა და მისი მხარდაჭერით მოხდა ამ ძალიან მნიშვნელოვანი პროექტის რეალიზება“, – აღნიშნა მამუკა ბახტაძემ.
