როდესაც პოლიცია მივიდა გიორგი ჭელიძის სახლში ჩხრეკის ჩასატარებლად, ბრალდებული შევიდა სააბაზანოში, მოანგრია უნიტაზი, მოგლიჯა საკანალიზაციო მილი და იქ ცდილობდა ვაზნების ჩარეცხვას, თუმცა ვერ მოახერხა, - ამის შესახებ "ეროვნული ერთობის" ლიდერის, გიორგი ჭელიძის სასამართლო პროცესზე საქმის პროკურორმა განაცხადა.
მან პროცესზე ბრალდებული ჭელიძისთვის მკაცრი აღკვეთის ღონისძიების შეფარდების მოთხოვნისას იმ საფრთხეებზე ისაუბრა, რაც შესაძლოა, მის გათავისუფლებას მოყვეს.
"გიორგი ჭელიძეს საკმაოდ ახლო ურთიერთობა აქვს საქმეზე სასამართლოში მოწმედ დასაკითხ პირებთან და არსებობს მოწმეებზე ზემოქმედების საფრთხე, რათა მათ ბრალდებულის სასარგებლო ჩვენება მისცენ", - განაცხადა პროკურორმა.
თბილისის საქალაქო სასამართლო გიორგი ჭელიძისთვის აღკვეთის ღონისძიების შეფარდებაზე მსჯელობს.
