ხორავას ქუჩაზე მოზარდების მკვლელობის საქმეზე შექმნილი პარლამენტის დროებითი საგამოძიებო კომისიის სხდომას ხვალ შესაძლოა, საპარლამენტო უმრავლესობის წევრები არ დაესწრონ. ამის მიზეზად კომისიის ერთ-ერთი წევრი, ანრი ოხანაშვილი „ევროპული საქართველოს“ მიერ მოუმზადებელ დოკუმენტს ასახელებს.
„მათ გადაწყვიტეს, რომ სამუშაო შეხვედრები გამართონ. რომელ სამუშაო შეხვედრაზეა საუბარი, მაშინ როცა საბოლოო რედაქცია დოკუმენტის არ გვაქვს. ჩვენ შევთავაზეთ წარმოგვდიგინონ დასრულებული დოკუმენტი უმოკლეს ვადაში, რომელსაც დეტალურად გავეცნობით. ასევე, შევთავაზეთ, რომ ორშაბათიდან დაგვეწყო აქტიური განხილვა, თუკი, დღეს წარმოგვიდგენდნენ დოკუმენტს. თუმცა, ამ ეტაპამდე რაც წარმოგვიდგინეს, ეს არ არის დოკუმენტი, ეს არის არაკომპეტენტურობა იმ საკითხებზე მსჯელობისას, რაც იქაა წარმოდგენილი.
კომისიის სხდომებს დავესწრებით მაშინ, როგორც კი გვექნება საბოლოო რედაქტირებული დოკუმენტი, რომლის წაკითხვის და გაცნობის შესაძლებლობაც გვექნება", - განაცხადა ოხანაშვილმა.
