მერაბიშვილი ჯანმრთელობის მდგომარეობა პრაქტიკულად იგივეა, ვერ ვიტყვი, რომ გაუმჯობესდა, მიუხედავად იმისა, რომ მედიკამენტოზურ მკურნალობას გადის, - განუცხადა „ჯი-ეიჩ-ენს“ ყოფილი პრემიერ მინისტრის, ვანო მერაბიშვილის ადვოკატმა, გიორგი ჩივიაშვილმა.
ის მერაბიშვილთან სასჯელაღსრულების #9 დაწესებულებაში დღეს იმყოფებოდა. როგორც ადვოკატი განმარტავს, თუკი, ყოფილი პრემიერის ჯანმრთელობის მდგომარეობა უახლოეს დღეებში არ გაუმჯობესდება, მისი კვლავ სამოქალაქო სააავადმყოფოში გადაყვანა გახდება საჭირო.
„კიდევ ერთი კვირა დაველოდებით, რომ ეს კურსი ჩამთავრდეს. თუ ამის შემდეგ შედეგი ისევ არ იქნება, უკვე შუამდგომლობა გვექნება, რომ კვლავ მოხდეს მისი გაყვანა და სამოქალაქო საავადმყოფოში მოთავსება.
ერთ კვირაში, სხვადასხვა კლინიკაში ორჯერ იყო გაყვანილი. ძირითადი პრობლემა სასუნთქი გზების ანთება და მისგან გამოწვეული სხვა ტიპის დაავდებებია“, - აცხადებს ადვოკატი.
როგორც ის განმარტავს, მერაბიშვილს ჯანმრთელობის პრობლემები ციხეში შეექმნა.
„დაპატიმრებამდე მას სასუნთქ გზებზე პრობლემა არ ჰქონია. როგორც მოგეხსენებათ, ის სამარტოო საკანში იმყოფება, პრაქტიკულად, კარცერის ტიპის საკანშია. ეს ადამიანი მეექვსე წელია დაპატიმრებულია და დღეში მხოლოდ 40 წუთი ეძლევა იმის შესძლებლობა, რომ სუფთა ჰაერზე გაისეირნოს. ბუნებრივია, ეს პირობები ისეთ სიტუაციას არ წარმოშობს, რომ ადამიანმა სრულად შეინარჩუნოს ჯანმრთელობა“, - აღნიშნავს უფლებადამცველი.
ყოფილ პრემიერ მინისტრს საპყრობილის დატოვებამდე წელიწადნახევარზე მეტი დარჩა.
მისთვის მისჯილი წლები და ბრალდებები ასე გამოიყურება.
1."აკურას“ ღვინის ქარხნის უკანონოდ ჩამორთმევის საქმე - 2 წელი და 3 თვე.
- სანდრო გირგვლიანის საქმეზე მტკიცებულებების გადამალვა - 3 წელი.
- აქციის დარბევა 2011 წლის 26 მაისს - 4 წელი და 6 თვე.
- მითვისება გაფლანგვა და ამომრჩევლის მოსყიდვა - 5 წელი.
- ვალერი გელაშვილზე ფიზიკური ანგარიშსწორება - 6 წელი და 9 თვე. სასჯელის შთანთქმის პრინციპით, ვანო მერაბიშვილს სასჯელის საბოლოო სახედ 6 წლითა და 9 თვით თავისუფლების აღკვეთა განესაზღვრა.
მერაბიშვილი, რომელსაც 2012 წელს, ხელისუფლების შეცვლამდე პრემიერ-მინისტრის თანამდებობა ეკავა, მანამდე კი შინაგან საქმეთა მინისტრი იყო, 2013 წლის 21 მაისს დააკავეს.
