აზრის გამოხატვის გამო მუქარა და ფსიქოლოგიური ძალადობა, დაჩაგვრა არის მიუღებელი, ისეთივე მიუღებელი როგორიც თავად ჰომოფობია, - ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე ფეხბურთელ გურამ კაშიას ირგვლივ განვითარებულ მოვლენებთან დაკავშირებით სოციალურ ქსელში წერს.
მისი თქმით, ასეთი ფსიქოლოგიური ძალადობა, დაჩაგვრა და აგრესია გურამ კაშიაზე, არავის გვეკადრება.
"ერთმანეთის პატივისცემა მეტად გვმართებს.
მესმის, რომ ჩვენს საზოგადოებაში ადამიანებს აქვთ განსხვავებული ხედვები, აზრი. თითეულ ჩვენგან აქვს ამ აზრის გამოხატვის თავისუფლება, მათ შორის გურამ კაშიასაც, მათ შორის იმათაც, ვინც მას არ ეთანხმება. ამისთვის არსებობს შესაბამისი ფორმა.
აზრის გამოხატვის გამო მუქარა და ფსიქოლოგიური ძალადობა, დაჩაგვრა არის მიუღებელი, ისეთივე მიუღებელი როგორიც თავად ჰომოფობია", - წერს კილაძე.
ცნობისთვის, გურამ კაშიამ სოციალურ ქსელში მიღებული მუქარის შემცველი წერილების გამო, ოფიციალური Facebook გვერდი გააუქმა, ხოლო ინსტაგრამის ანგარიში უცხო ადამიანებისთვის დახურა. გურამ კაშია საზოგადოების მცირე ნაწილის კრიტიკის მსხვერპლი კიდევ ერთხელ მაშინ გახდა, როდესაც UEFA-მ ის დააჯილდოვა.
სოციალურ ქსელებში გურამ კაშიას მხარდამჭერი აქცია მიმდინარეობს. მისი მხარდამჭერები აზიარებენ ფოტოებს ჰეშთეგით #გურამშენთანვართ
