საქართველოს პრეზიდენტს გიორგი მარგველაშვილს საპრეზიდენტო ვადა გასდის და როდესაც თავისი კონსტიტუციური ვალდებულების შესრულების წინაშე დადგა, ფაქტობრივად დაინახა, რომ მის მიმართ ნდობა არ არსებობს, – ამის შესახებ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა განაცხადა.
მისი თქმით, გიორგი მარგველაშვილმა ვერ შეძლო თავისი კონსტიტუციური ვალდებულების შესრულება და ერთი კანდიდატის წარდგენა.
„ფაქტობრივად, პრეზიდენტმა დაინახა, რომ მის მიმართ ნდობა არ არსებობს არც უმრავლესობაში, არც უმცირესობაში და არც საზოგადოების სხვადასხვა ჯგუფში. მან ვერ შეძლო თავისი კონსტიტუციური ვალდებულების შესრულება და ერთი კანდიდატის წარდგენა. პრეზიდენტი ამბობს, თითქოს უმრავლესობა არის მიზეზი, რომ მას არ დაუმტკიცეს და აპრიორი არ წარადგენს მაშინ, როდესაც არაერთი შემთხვევა გვქონია, რომ პრეზიდენტს წარმოუდგენია თავისი კანდიდატურა, დაგვიმტკიცებია, მაგრამ ეს ის ნათელი მაგალითია, როცა თავის უსუსურობას ავლენს. ეს სამწუხარო რეალობაა“, – განაცხადა ირაკლი სესიაშვილმა.
ცნობისთვის, გიორგი მარგველაშვილი უზენაესი სასამართლოს თავმჯდომარეობის კანდიდატს სავარაუდოდ, აღარ წარადგენს.
