რუსეთის წინააღმდეგ სტრასბურგის სასამართლოში ახალი საჩივრის შეტანა დაგვიანებულია, მაგრამ მნიშვნელოვანია, რომ პროცესი დაიწყო, - ამის შესახებ "ევროპული საქართველოს" წევრმა სერგო რატიანმა განაცხადა.
მისი თქმით, რუსეთში უნდა იცოდნენ, რომ რეაგირების გარეშე არც ერთი შემთხვევა არ დარჩება.
„დიდი ხანია მოვუწოდებთ ხელისუფლებას, მოამზადოს მსგავსი სარჩელი. აუცილებელია, გადადგმულიყო ეს ნაბიჯი. პროცესი ერთგვარად დაგვიანებულია, მაგრამ ახლა მნიშვნელოვანია, რომ ეს პროცესი დაწყებულია და პირველ რიგში, მნიშვნელოვანია იმისთვის, რომ გახდეს შემაფერხებელი ფაქტორი რუსეთის აგრესიული მოქმედებებისა. ერთი მხრივ, ეს არის საერთაშორისო საზოგადოების ზეწოლა რუსეთზე. იქ უნდა იცოდნენ, რომ რეაგირების გარეშე არც ერთი შემთხვევა არ დარჩება. ყველაფერი ეს არის ჯაჭვი პოლიტიკისა, რომელიც შემაფერხებელი ფაქტორი უნდა გახდეს“, – განაცხადა სერგო რატიანმა.
შეგახსენებთ, იუსტიციის სამინისტრომ 21 აგვისტოს სტრასბურგის სასამართლოში რუსეთის ფედერაციის წინააღმდეგ საქართველოს სახელით ახალი სახელმწიფოთაშორისი საჩივარი – „საქართველო რუსეთის ფედერაციის წინააღმდეგ“ შეიტანა.
