ექსპერტმა დაადასტურა, რომ გოგონას დაზიანებების მიყენებისას სამი საგანია გამოყენებული. ეს არის ბლაგვი საგანი, ბასრი საგანი, რომელსაც ყუა არ გააჩნია და მჩხვლეტავი, ბასრი საგანი, რომელსაც გააჩნია ყუა, ეს სავარაუდოდ დანაა. შეუძლებელია, მკვლელობისას ერთ ადამიანს სამი საგანი ეკავოს ხელში, ანუ გამოდის რომ დანაშაულში დაუდგენელ პირთა წრე მონაწილეობდა, - ამის შესახებ თემქაზე 20 წლის ანა ნაცვლიშვილის მკვლელობის საქმეზე ბრალდებულ ლადო გრიგალაშვილის ადვოკატმა, ნაირა ოტიაშვილმა განაცხადა.
მისი განმარტებით, მკვლელობაში მონაწილე პირთა წრე გამოძიებას გამოკვეთილი არ ჰყავს და არც დანაშაულის ჩადენის იარაღი აქვს ამოღებული.
"ამ დანაშაულში მონაწილე პირთა წრე დადგენილი არ არის. ვიმეორებ, 3 საგანი ერთ ადამიანს ვერ ეჭირებოდა ხელში, ანუ გამოდის რომ დაუდგენელ პირთა წრე მონაწილეობდა. რამდენი პირი მონაწილეობდა ვერ გეტყვით, მაგრამ ერთზე მეტი პირი მონაწილეობდა. საგნები, რომლითაც ეს ჭრილობებია მიყენებული, გამოძიების მიერ ამოღებული არ არის და არც პირთა წრეა დადგენილი. მე არ ვიცი რას ვიხილავთ საერთოდ", - განაცხადა ოტიაშვილმა. მისივე განმარტებით, დღეს გამოკითხულმა ექსპერტ-კინოლოგმა საინტერესო დეტალი გამოკვეთა.
"ძალიან მნიშვნელოვანი გარემოებაც გამოიკვეთა, ძაღლი, რომელიც შემთხვევის ადგილზე მიიყვანეს და რომელმაც სუნის ნიმუში აიღო, სულ სხვა ტრაექტორიით წავიდა, ანუ გურამიშვილის მეტროს მიმართულებით წავიდა, ისევ უკან ამოტრიალდა და ერთ-ერთ კორპუსთან, რომელიც ბრალდებულის სახლიდან ძალიან შორს არის, იქ, მე-4 სადარბაზოსთან გაჩერდა. თუმცა, კინოლოგმა არ იცის იმ სადარბაზოსთან ან ძაღლმა, ან კინოლოგის მეწყვილემ, გამომძიებელმა რა მოიმოქმედა. ეს ალბათ, შემდეგ პროცესზე გაირკვევა", - განაცხადა ოტიაშვილმა.
შეგახსენებთ, რომ თბილისში, თემქაზე 20 წლის ანა ნაცვლიშვილის მკვლელობის საქმეზე მისი შეყვარებული, ლადო გრიგალაშვილი დააკავეს, ის ჩადენილ დანაშაულს არ აღიარებს და დუმილის უფლებით სარგებლობს. შემდეგი პროცესი 14 სექტემბერს, 14:00 საათზე ჩაინიშნა.
